Simula ng Mahal na Araw

GINUGUNITA ngayon ng mga Katoliko ang pagpasok ni Jesus sa Jerusalem. Maraming tao ang sumalubong at nagbunyi kay Jesus. Subalit makalipas lang ng ilang araw ang mga tao ring iyon ang sumigaw na ipako siya sa krus. Nilitis siya. Binayaan ni Pontio Pilato ang mga tao ang magpasya kung sino kina Jesus at sa tulisang si Barabas. Naghugas ng kamay si Pilato bilang tanda na wala siyang pananagutan sa desisyong ipako sa krus si Jesus.

Gaya ni Jesus, bawat isa sa atin ay mabigat na krus na pinapasan. Sa kasalukuyan, marami rin ang katulad ni Pilato na naghuhugas-kamay sa mga kasalanan. Sa mga hukuman ay mayroon pa ring mga tinaguriang hoodlums in robe. Marami ang napaparusahan ng walang sala at ang mga tunay na salarin ay nakakalaya. Maraming kasong mananatiling walang kalutasan gaya ng pagpatay kay Ninoy Aquino, Bobby Dacer at sa kanyang tsuper at ang malagim na wakas ng artistang si Nida Blanca.

May mga nasentensiyahan ng bitay pero hindi naman naipatupad ang hatol ng batas sa mga kadahilanang nalalambungan ng pag-aagam-agam at takot sa kapangyarihan ng ilang maimpluwensiya sa lipunan. Nagrereklamo ang pamilya ng mga biktima ng karahasan sa kawalan ng hustisya at maging ang mga human rights victims ng nakaraang rehimeng Marcos ay sumisigaw ng katarungan sa pagyurak sa kanilang karapatan at dangal at maging hinihintay nilang kabayaran mula sa Marcos ill-gotten wealth ay hanggang sa ngayon ay hindi pa rin nila napapakinabangan.