Issue sa smuggling,ningas cogon

MAY 500 imported luxury vehicles ang naka-hide sa mga bodega ng ilang locators sa loob ng SBMA. Naghihintay ng blessing sa padrino nila sa Palace in the sky este mali Palasyo pala para puwersahang makalabas at hindi magbayad ng tamang buwis sa gobyerno.

Ang istilo ay katulad ng 19 container vans na may lulang dressed chicken na puwersahan ipinuslit palabas ng Port of Batangas. Watch out!

Naggagandahan ang mga vehicles na itinago ng mga galamay ng economic saboteurs sa loob ng SBMA. All-out war kasi ang new policy ni Prez Gloria versus smugglers. Take note, BOC Commissioner George Jereos, Your Honor!

Two months lang ang ultimatum mo George kay Prez Gloria, for your information. Hubaran ng brief este mali maskara pala ang mga tirador sa bureau na nagpabagsak sa ekonomiya.

Lalong naghirap ang mga mahihirap sa mga kamoteng ito. DSWD Secretary Dinky Soliman, Your Honor. Ang ukay-ukay for donation kamusta na kaya, Dinky?

Kaya kailangan bantay-salakay este mali magbantay ang Noypi laban sa mga nagpapahirap ng bayan.

Hindi lang pala sa Subic, Cebu, POM, Batangas at MICP idinadaan ang mga imported luxury vehicles kundi maging sa probinsiya ng Palawan ay bagsakan na din.

Matindi ang naging isyu sa smuggling nitong mga nagdaang araw marami ang sumakay at nagpa-bright-bright pero mukhang walang nangyari sa mga question and answer. Nagbatuhan lang ng mabahong utot este mali accusations pala.

‘‘May malaglag kayang smugglers sa ginagawang investigation?’’ tanong ng kuwagong haliparot.

‘‘Palagay ko wala,’’ sagot ng kuwagong mangangamote.

‘‘Bakit naman?’’ tanong ng kuwagong Kotong cop.

‘‘Paano mapapatunayan na smugglers ang isang kamote eh nakalabas na ang epektos nito sa bureau?’’ anang kuwagong SPO-10 sa Crame.

‘‘Dyan palagay ko may puntos ka, kamote.’’

‘‘Paano ang imbestigasyon?’’

‘‘Iyan ang abangan natin, tekamots.’’