Lolobo ang populasyon at darami ang problema

APAT na sanggol ang ipinapanganak bawat minuto sa Pilipinas. Ang populasyon ng Pilipinas ngayon ay 84 milyon at sa susunod na 25 taon ay inaasahang magiging 169 milyon.

Parami nang parami ang Pinoys at parami nang parami rin ang mga problema ng bansa. Isa sa mga sinasabing solusyon ay ang pagpaplano ng pamilya. Ang two-child policy na inisponsor ni Rep. Edcel Lagman ay patuloy pa ring pinagtatalunan.

Ayon kay Dr. Jonathan David Flavier ng DOH, dapat palawigin ang reproductive health program. Sinabi ni Dr. Flavier, panganay na anak ni Sen. Juan Flavier, ang paglobo ng bilang ng mga anak ay dahil sa kawalan ng impormasyon at serbisyo kaugnay sa family planning. Ipinaliwanag niya na dapat na magkaroon ng pagkakaunawaan ang mag-asawa para mapigil ang panggigigil ng bawat isa.

Sinabi ni Dr. Flavier na dapat na buksan ang isipan ng mag-asawa sa natural birth control at artificial birth control. Ang natural birth control, na aprobado ng simbahang Katoliko ay hindi dumidepende sa gamot at instrumento. Rhytm method ang ginagawa ng mag-asawa pero hindi apektado hindi ito sa lahat. Applicable ito kung regular ang pagreregla ni misis at alam niya ang kalendaryo at kabisado kung kailan siya mangingitlog o nasa fertile stage siya. Saklaw naman ng artificial birth control ang paggamit ng contraceptives gaya ng pills, IUD, paggamit ng condom at iba pa. Meron din namang kontento na sa withdrawal pero may psychological effect ito kaya hindi ipinapayo.

Ang pagtatalik ay pinakamaganda at pinakamasarap sa mag-asawa na dapat ding gamitin ng talino para maiwasan ang sunud-sunod sa pagbubuntis.