Kung tutuusin, libu-libo ring tao ang dapat na piliin kapag may bagong administrasyon sapagkat ang mga dating nakaupo ay inililipat sa ibang posisyon at ang iba naman ay co-terminus ng mga opisyal ng dating pamahalaan. Dito nauso ang kasabihang ‘‘weather-weather’’ lamang o pana-panahon lamang, ika nga. Ang gustong sabihin nito ay, panahon ninyo ngayon, kaya ok lang kung kayo ang maupo. Kami naman ang uupo kapag mga padrino namin ang nasa power.
Kakikitaan na ang pagkainis kay President Arroyo kapag tinatanong siya ngayon kung kailan at mga sino ang napili na niyang mga uupo sa kanyang Gabinete at mga pangunahing tungkulin sa pamahalaan. Ang malimit niyang sagot ay malapit na sapagkat marahil ay talagang nahihirapan si President Arroyo sa pamimili kung sino sa mga nakaupo na ang papalitan niya at mga sino ang ipapalit niya sa mga ito.
Sa Gabinete na lamang, may mga nagbulong sa akin na mahigit na sa isang libo ang mga applications na nasa Malacañang. Kanya-kanyang lakaran ang ginagawa ng mga nais na ma-appoint na secretary at presidential advisers. Matindi ang gamitan ng mga padrino na karaniwan ay mga senador, congressman at mga malalaking pulitiko. Pati mga maimpluwensiyang negosyante kasama na ang mga kilalang Chinese business leaders ay abalang-abala rin sa paglalakad para sa kani-kanilang mga bata.
Umaasa ako sa pangako ni President Arroyo na babaguhin niya ang masama at mabahong pananaw ng taumbayan sa mga naglilingkod sa pamahalaan.