Araw ng Kalayaan

BUKAS ay gugunitain ng Sambayanang Pilipino ang ika-106 anibersaryo ng Kalayaan ng bansa.

Ayon kay Tourism Secretary Roberto Pagdanganan ang Independence Day ay isa sa malaking selebrasyon ng kasaysayan at bawat mamamayan ay dapat na makiisa sa pagbibigay pugay sa mga bayaning nagbuwis ng buhay para matamo ang kalayaan. Ayon kay Pagdanganan lahat ay inaanyayahan na panoorin at makilahok sa isang Grand Parade sa Quirino Grand Stand kung saan ang lahat ng pamahalaan at maging ng pribadong sector ay makiisa sa makulay at makasaysayang parade.

Noong Hunyo 12, 1898 prinoklama ni Heneral Emilio Aguinaldo ang kalayaan ng Pilipinas. Ginanap ito sa tahanan ni Aguinaldo sa Kawit, Cavite. Sa Malolos, Bulacan namuno si Aguinaldo sa paglunsad ng isang Kongreso na siyang gumawa ng konstitusyon. Hinirang si Aguinaldo bilang kauna-unahang pangulo ng Pilipinas noong Enero 22, 1899.