Marami pa ang maghahabla sa Meralco

MAY mga text messages akong tinanggap mula sa mga taong natutuwa sa balak ng pamunuan ng City State Hotel sa Quiapo na kasuhan ng P50-milyong danyos ang Manila Electric Company (MERALCO) dahil sa pagsabog ng transformer nito na ikinasunog ng naturang hotel. "Ako at ang daang-libong iba pa na sawa na sa pagka-arogante ng MERALCO dahil sa pagkabigong ibalik ang sobrang nakulekta sa PPA ay sumusuporta sa City State Hotel," ani Mrs. Zenaida Montero ng Pasong Tamo, Makati. Marami rin akong kaibigan na nakabasa sa ating kolum na nagsabing "serve ’em right." Tinutukoy din nila ang ganyang insidente sa Caloocan sometime last year na naging dahilan ng pagkamatay ng mga estudyanteng nag-aabang ng masasakyan.

Ironically, ang sinisisi ng MERALCO ay ang pamunuan ng City State Hotel Hindi raw maayos ang pagkakainstila ng mga electrical connections nito. Ngunit lumabas na ang resulta ng pagsisiyasat ng mga arson investigators sa pamumuno ni Chief Engr. Ernesto Cuyugan. Mahinang klase ng materyales ang ginamit ng MERALCO sa ikinabit na transformer kung kaya’t sumabog at naging sanhi ng sunog. Kaya may katuwirang maghabla ang City State Hotel ng P50M-danyos laban sa MERALCO. Balita ko, nag-usap-usap na rin ang mga ibang establisimentong nadamay at pati sila’y magsasampa na ng kaso laban sa MERALCO.

Nakikisimpatiya rin sa hakbang na ito ang iba’t ibang grupo na kumokontra sa kontrobersyal na Purchased Power Adjustment (PPA). Mantakin mo nga naman na sa bilyun-bilyong kinikita ng MERALCO sa PPA na mula sa naghihikahos na lukbutan ni Juan dela Cruz ay hindi pa maisaayos ang mga pasilidad nito?

Madaling mag-deny. Ang denial ang siyang tanging magagawa ng sino man na nababaon sa kagipitan. Pero paanong masisisi ng MERALCO ang electrical connection ng hotel gayung napakahigpit ng City Engineer’s Office ng Maynila lalu na sa mga malalaking gusaling itinatayo? At pagpalagay nating palpak nga ang electrical connection ng hotel, makalulusot ba ito sa mapanuring mata ng MERALCO lalo pa’t maglalagay sila ng transformer.

Kailangang harapin ng MERALCO ang pananagutan. Huwag nang ibunton ang sisi sa kanilang naperhuwisyo. Public utility company, ang MERALCO at dapat kumilos para mabawasan, kundi man lubusang maiwasan ang ganitong mga insidente na nagsasapanganib sa buhay ng tao.