Jueteng sa Bicol!

NASA ledger o blue book ng mga gagong bangka ng dayaan bolahan ang pangalan ng Chief Kuwago, kaya kasama siya sa intelihensiya o tumatanggap ng pitsa sa grupo nina Alex Tam-ad at Art Kabigtak. Ito ang ibinulong ng mga asset sa mga kuwago ng ORA MISMO.

Magsasawa sa kababanat ang mga kuwago ng ORA MISMO, pero hindi titigil sa kanilang operasyon ang grupo ng mga kamote, anang asset. Thousand of pesos, ang pitsang ibinigay nila sa mga Kotong cops kaya continue ang kanilang pasugal.

Kaya masayang-masaya ang mga unggoy sa kanilang illegal activities sa Camarines Norte dahil P2 million pala ang kanilang kubransa sa mga sugapa rito. Bago dumating ng town proper ilang metro ang layo sa Daet, Camarines Norte Coliseum, nakatirik ang safehouse ng dayaan bolahan nina Alex Tam-ad at Art Kabigtak.

Dito pala ang kanilang lungga, anang mga asset ng mga Kuwago ng ORA MISMO. Hanggang Albay pala ang kanilang operasyon ng dayaan bolahan. Take note, PNP bossing Jun Ebdane, Your Honor! Gusto palang hawakan ng grupong ito ang Sorsogon dahil walang matibay na bangka ng jueteng sa nasabing lugar.

Ginagamit pala nila ang pangalan ni Papa Mike sa kanilang illegal gambling activities dahil may blessing daw ang una sa dalawang tunggak. Kaya hindi siguro makagalaw ang PNP sa Region 5? Nagtataka ang mga kuwago ng ORA MISMO, dahil sangkaterba ang PNP sa Region 5 pero parang tulog sila pagdating sa isyu ng jueteng nina Art Kabigtak at Alex Tam-ad. Bakit kaya?

Si Tony Ong, pala ang financer ng dayaan bolahan sa Albay dati itong tirador sa Region 3. Dati itong druglord baka hindi alam ng PNP sa Region 5 kung sino si Tony Onggoy.

"Marami kasanggang opisyal sa PNP si Art Kabigtak kaya hindi sila kayang pigilin," anang kuwagong haliparot.

"Kesyo naka-timbre raw sila sa CIDG, IG, sa office ng Chief PNP?" sabi ng kuwagong pulis na naglalanggas ng galis.

"Tingnan natin ang tigas nila".

"Supt. Robert Rongavilla, alam mo ba ito?"

"Kung hindi umalis ka na dyan!" anang kuwagong CO2-10 sa Aguinaldo.

"Para kaya sa eleksyon ang ibinibigay na ganansiya ng mga jueteng lord?" tanong ng kuwagong Kotong cop.

"Iyan ang itanong natin sa Palasyo" sagot ng kuwagong SPO-10 sa Crame.

"Sige abangan natin, kamote".