Ang programang ito ay bukas sa lahat, miyembro man o hindi ng Pag-IBIG Fund. Kung ang mangungupahan ay hindi pa miyembro, kailangang magparehistro sa Pag-IBIG kung naaprubahan na ang aplikasyon.
Ang mga karagdagang kuwalipikasyon upang maging benepisyaryo sa programang ito ay may buwanang kita na hindi bababa sa P4,000 wala pang bahay na pag-aari, walang outstanding housing loan sa anumang ahensiya o banko, pribado man o sa gobyerno, may kapasidad na pumasok sa legal na kasunduan o kontrata at hindi pa nakakakuha ng bahay sa ilalim ng Rent-to-Own program ng Pag-IBIG.
Ang Pag-IBIG Fund ay nagpapaskil ng listahan ng mga bahay na maaaring paupahan sa lahat ng opisina nito; sa corporate headquarters at sa mga opisina nito sa National Capital Region at regional offices. Ang listahang ito ay palaging ina-update.
Sa ilalim ng Rent-to-Own Program magiging mas magaan ang pagbabayad ng renta sapagkat ang bahay na inuupahan ay maaaring maging pag-aari ng nangungupahan.