Kaso ng tumalbog na tseke

NAG-ISYU ng 64 na tseke si Omar pabor kay Ronnie para sa rediscounting nito, kabilang ang 12 tseke na may kabuuang halagang P1,392,500. Subalit lahat ng nasabing tseke ay tumalbog sa dahilang ‘‘Account Closed.’’ Kahit na maraming beses hiniling ang bayad mula kay Omar, hindi ito tumupad.

Nahatulan ng Korte si Omar at hindi isinaalang-alang ang kanyang depensa na ang tseke ay inisyu ng isang korporasyon. Bukod pa sa 64 at 12 tseke, nag-isyu na pala siya noon ng 50 tseke kung saan siya ay nahatulan na rin ng korte. Nahatulan si Omar sa kasong paglabag sa B.P. 22 na may sentensiyang anim na buwang pagkakakulong ng 12 beses at naatasang bayaran ang P1,392,500 na may kasamang 12% na interes. Ang desisyon ng mababang hukuman ay kinumpirma ng Court of Appeals (CA).

Umapila si Omar sa Korte Suprema. Dito ay iginiit niya na ang naunang 50 tseke na kanyang inisyu ay hindi maaaring maging basehan ng parusang ipapataw sa kanya. Ang nasabing 50 tseke ay parte raw ng 64 na tsekeng inisyu niya. At dahil ang kanyang ginawang pag-iisyu ng tseke ay bunga ng isang kriminal na intensyon, dapat ay isang complaint o information lamang ang isinampa laban sa kanya. Tama ba si Omar?

Hindi po. Naiiba ang naunang hatol sa kanya base sa 50 tseke sa 12 tseke ng panibagong hatol sa kanya. Ang pag-isyu niya ng 50 tseke at ng 12 tseke na bahagi ng 64 na tseke ay mabigat na krimen. Hindi maaaring patawan lamang ng multa ang ganitong krimen. Ayon sa batas, ang bawat pag-isyu ng tsekeng tumalbog ay isa nang paglabag sa B.P. 22. At dahil malum prohibitum ang BP 22, ang kriminal na intensyon ay hindi isinasaalang-alang. Ang tsekeng tumalbog ay isang mabigat na krimen hindi lamang sa taong tumanggap nito kundi pati na rin sa lipunan lalo na sa usaping komersyo. (Lim vs. People, G.R. 143231, October 26, 2001.)