’Yan din ang sabi ni Archbishop Capalla, papasok na presidente ng Catholic Bishops Conference of the Philippines. Dahil sa sobrang pulitika at kabulukan sa gobyerno, nalalapit ang "revolutionary situation." Galit at demoralisado na ang mamamayan, aniya, at nais ng pagbabago.
’Yan din ang matagal nang napansin ng milyon-milyong Pilipino na lumipat na sa Amerika o Australia. Di lang basta laganap na pulitika at kabulukan, kundi kawalan ng mapayapang solusyon ang nakinikinita nila. Kaya lumayo na lang sa gulo.
Talaga ngang nakakasuklam na ang gobyerno. Kahit anong partido ang umupo, pagpapayaman lang ang inaatupag. May nagkukudeta para raw ayusin ang sistema, pero nabibistong ganid din pala sa pera’t poder. May nagrerebolusyon para baguhin ang sistema, pero nabibisto ring nagpapasarap lang sa ibang bansa.
Mga pulitiko rin ang sumisira sa sistema. Ang Oposisyon, walang tigil ang pagbanat sa Administrasyon. Ang Kamara de Representante at Senado, panay ang bangayan. Tapos, pina-i-impeach pa ng dating Presidente ang Korte Suprema.
Sila rin ang sumisira ng tiwala ng bansa sa iba pang institusyon: Media, simbahan, pulis, militar, batas, kabutihang-asal, pamilya. At nahahawa sa asal nila ang mamamayan.
Samantala, sa galit sa sitwasyon, may nagsasabing magbabago lang ang asal-Pilipino kung makaduguan. Kesyo kailangan daw magtuos ang mga magkalabang partido at paksiyon –matira ang matibay. Kesyo dapat daw ipapatay lahat ng edad-18 o mas matanda –para lumikha ng isang henerasyon na di pa nababahiran ng corruption. Desperado na talaga ang Pilipino sa pag-asam ng pagbabago. Tama si Guingona.<