Tumigil kayo sa katarantaduhan ninyo Joaquin, mag-sweetheart na Francisco, Jun Peklat, Loyd Scarface at Mary Ann, maraming anan este mali nunal pala akala ninyo hindi kayo makakapa ng mga kuwago ng ORA MISMO.
Kahit sa Malolos pa kayo magtago kapa ng mga kuwago ng ORA MISMO, ang kuweba n’yo diyan sa subdivision na tinitirikan ninyo mga hunghang.
Ikaw Big Mama, wala kang kasawa-sawa sobra na ang panloloko mo sa gobyerno.
Ang mga gagong nabanggit ay kilalang-kilala sa mga Customshouses, LTO at maging sa TMG dahil matindi ang mga transaksyon ng mga tirador.
Kaya madalas nakasahod ang mga kamay ng mga kamoteng kontak nila oras nakita sila sa mga nasabing ahensiya.
Ika nga, hindi malaman kung militar o PNP ang mga kamote dahil panay saludo ng mga ito habang dumadaan ang mga economic saboteurs sa kanilang tanggapan.
Napakalakas ng grupo ni Ric Water, ang nagtutubig-tubig na utak ng sindikato sa Subic sa LTO offices partikular kay Kiam Bow at TMG.
One Hundred Fifty Thousand (P150,000) ang singil ng grupo ni Ric Water para manipulahin ang mga documents ng imported vehicles sa mga taong magpapalakad sa grupo niya.
Pero P80,000 ang para kay Kiam Bow ng LTO, kada isang talon na sasakyan para maayos ang clearance nito.
‘‘Naku kulang ulit ang espasyo ng Chief Kuwago ang dami pa namang sasagasaan nito,’’ sabi ng kuwagong SPO-10 sa Crame.
‘‘Eh, ano ang gagawin natin?’’
‘‘Bumili ka ulit ng Pilipino Star NGAYON, para sa susunod na isyu ng ORA MISMO, kamote!’’