Tax amnesty para sa unexplained wealth

NAGHAIN ng courtesy resignation ang top brass officials ng Bureau of Customs noong Huwebes ng gabi kay DOF Secretary Jose Camacho para ibigay kay Pres Gloria.

Sabay-sabay nagsumite ng letter of resignation sina Customs Commissioner Antonio Bernardo at ang apat niyang Deputy Commissioners sina Ray Allas, Jorge Jereos, Gil Valera at Alexander Arevalo dahil sa pagkapikon nila sa istilo ng lifestyle check ng Transparency Group ng Palasyo.

Trial by publicity at walang due process anang mga naapektuhan.

Hindi raw makatarungang publisidad ang ginagawa ng Malacañang sa mga hinihinalang sangkot sa pagpapayaman sa puwesto.

Nagprotesta kasi ang ilang tinamaang mga opisyal ng BOC kaya nag-ala-Trillanes ang grupo ni Bernardo?

Pero hindi sila lumalaban sa gobyerno ni Prez Arroyo gusto lang nilang iparating ang kanilang tampo sa Transparency Group.

Siguro mas maganda kung may tax amnesty para sa unexplained wealth para sa mga taong bina-background check ng Transparency Group.

Kikita pa ng malaki ang gobyerno at billion of pesos ang magiging koleksyon sa dami ng mga taga-government na kanilang tinitiktikan.

Mantakin mo kung tinanggap ni Prez Gloria ang pagbibitiw ng kanyang mga top brass sa BOC tiyak ang susunod na hakbang ng mga rank and file dito ay ang mass leave?

Siguradong malaking dagok ito kay Prez Gloria dahil tiyak matitigil ang operasyon sa mga daungan at airports.

Ang porte kasi ng customs ay trade facilitations at halos secondary na lang ang revenue collection.

Kasi kung walang kalakal tiyak walang magbubuwis.

Apektado ang bayan!

"Siguro dapat plantsahin muna ang gusot" anang kuwagong Kotong cop.

"Ayaw nga tanggapin ng Malacañang ang resignation nila."

"Matindi kasi ang magiging impact kapag nagkataon," sabi ng kuwagong SPO-10 sa Crame.

"Ano ba ang dahilan at masyadong mababaw ang isyu sa lifestyle check?" tanong ng kuwagong pulis na naglalanggas ng sariling galis.

"Iyan ang itanong natin kay Camacho at Tiglao."

"Ang resignation ng mga taga-BOC?"

"Hindi, ang tampuhan ng dalawa."

"Iyan na nga ba ang sinasabi ko, kamote."