Pikon,talo

PARANG hindi na mapigil ng mga nagrebeldeng sundalo ang kanilang sarili dahil parang galit sila habang ipinakita ang tunay nilang damdamin laban sa gobyerno sa imbestigasyong ginagawa ng Feliciano Commission at Senado.

Kaya nga madalas silang mapagalitan ng dalawang kunsumisyon este mali commission pala.

Halos pumutok ang butsi ni Lt. Sr. Grade Antonio Trillanes, habang tinatanong siya tungkol sa ginawa nila laban sa gobyerno ni Prez Gloria.

Kulang na lang murahin ni Trillanes si Prez Arroyo.

Parang plakang sira si Trillanes ng sabihin nitong dapat iwanan na ni Prez Gloria ang kanyang trono at ilan pang mga kabig nitong opisyal ng gobyerno.

Natutuwa ang mga kuwago ng ORA MISMO, dahil ginawang live coverage ang hearing para mabalanse ng bayan kung sino ba ang dapat paniwalaan sa mga batuhan ng utot este mali baho pala ng dalawang kampo.

Maraming kuwento ang aalingasaw dahil matagal pa ang batuhan ng mga utot este mali ulit baho pala.

Ika nga, esep-esep paganahin ng husto ang utak para makumbinsi ang bayan kung sino ang may right or wrong.

Bilib na sana ang mga kuwago ng ORA MISMO, sa mga evidence na nakuha nila laban kay Trillanes.

Nakakagulat ang mga nakapang information pero palpak din sa bandang huli.

Buti na lang bukas sa publiko ang hearing kaya hindi puwedeng takpan o putulin ang mga tanong at sagot ng bawat isa.

Salamat sa live coverage ng media!

Thank You, Lord!

Akalain mo pati ang kaibigan ng mga kuwago ng ORA MISMO, si Darly de Roca, eldest son ng may-ari ng Lydia’s Lechon, ay nasama pa sa usapin.

Mantakin mo nakabili daw ng Pajero si Trillanes ayon sa report iyon pala ang may-ari ay si De Roca.

Ganyan kagaling ang ating intelligence networking paggutom lalo’t gustong kumain ng litson de leche? He-he-he!

"Ano sa palagay mo ang mangyayari sa kaso ng gobyerno versus rebel soldiers?’’ tanong ng kuwagong pulis na naglalanggas ng sariling galis.

‘‘Naku matindi ang usapin marami pang mga bida at kontrabida ang susulpot hintay ka lang,’’ anang kuwagong sepulturero na naghahanap ng pustiso sa nitso.

‘‘Marami ba talagang ebidensya ang gobyerno laban sa grupo ng mga rebeldeng sundalo?’’

‘‘Kalma ka lang maghintay ka at marami pang isyu.’’

‘‘Tulad ng ano?’’

‘‘Iyan nga ang abangan mo kamote, he-he-he!"