Romano Talaga,talaga bang tatakbo kang congressman?

HAPPY 5th Anniversary sa Seagull Flight Foundation Inc. at kay Ed Castillo, Founder/Chairman nito.

Tagaytay Mayor Francis Tolentino, ang ganda ng proyekto ng Seagull kasi tumutulong ito sa mga drug dependents para mabigyan sila ng pag-asang makabalik sa kanilang bagong buhay.

Alam naman natin ang mga drug dependents ay naligaw ng landas. Droga kasi ang kanilang sinasanto at hindi diyos. Mayor Tolentino, tulungan natin ang mga pamilya ng drug dependents para magbagong-buhay.

* * *

Ang kuwento: Nagtatanong lang ang mamamayan sa Lucena City kung bakit lantaran na ang "paglalagay" ng mga proyekto ni Romano Talaga, bokal sa nasabing probinsya sa mga bayan ng ikalawang distrito ng Quezon na kinabibilangan ng Candelaria, Sariaya at Tiaong.

Kasi, masyado raw halata ang plano ni Talaga na tumakbong congressman. Bokal Talaga, talaga bang tatakbo ka?

May nagbulong sa mga kuwago ng ORA MISMO na halos lahat daw ng basketball court sa mga bayan na gustong takbuhan ni Bokal Talaga ay pinabago nito at pinalitan pa raw ng mamahaling basketball boards at rings. Talaga bang tatakbo ka sa 2nd District ng Quezon, Bokal Talaga?

Ang isang board and ring ay P15,000 daw ang halaga. Eh, dalawang pares ito kaya P30,000 daw ang gastos sa isang basketball court? Totoo ba talaga ito, Bokal Talaga?

Porke siya ang naglagay ng mga bagong basketball boards and rings siyempre nakasulat ang pangalan ni Bokal Talaga sa mga ito at pinalitan ang pangalan ng nasirang si Rep. Marcial Punzalan? Bokal Talaga, talaga bang tatakbo kang Congressman?

Ibinulong din sa mga kuwago ng ORA MISMO na hindi lang pala basketball boards and rings ang proyekto ni Bokal Talaga kundi free rin sa kanya ang mga medicine kasi may pa-medical mission pala ito sa mga nabanggit na lugar.

Nagtatanong sa atin ang ilang taga-Lucena City kung saan daw nanggagaling ang perang ginagastos ni Bokal Talaga sa 2nd District ng Quezon?

May nagtatanong kung sa Internal Revenue Allotment (IRA) ba ng Lucena City raw ito galing?

Asking din sa mga kuwago ng ORA MISMO ng mga taga-Lucena City kung puwede raw bang gastusin ang perang nakalaan sa Lucena sa mga proyekto para sa ibang bayan ng Quezon?