At kahit na tumutol na ang UN sa pagsalakay ng US at Britain, hindi nakinig ang dalawang higanteng bansa. Kumalat sa buong mundo ang protesta na huwag ituloy ang paggiyera sa Iraq. Ang mga Pinoy na kontra sa giyera, ay nakipagpatintero sa mga pulis. Marami ang pumutok ang ulo sa hampas ng truncheons. Pero ang protesta at kung anu-ano pang drama ay nawalang saysay.
Kailangang madis-armahan si Saddam sapagkat nanganganib ang buong mundo. Dapat wasakin ang WMD! Umarangkada ang koalisyon ng mga bansa at nakiisa sa pakikidigma sa Iraq. Isa ang Pilipinas sa mabilis na sumuporta na kailangan na ngang dis-armahan si Saddam. Noon pa man, lantaran na ang pakikisimpatya ng Pilipinas sa US. Nagsimula nang salakayin ng mga terorista ang US noong September 11, 2001.
Nasa ika-12 araw na ang digmaan. Marami na ang namamatay sa magkabilang panig. Marami na ang nawawasak na ari-arian. Bilyong salapi na ang nasasayang dahil sa pagsunog sa mga oil wells. Hindi na mabilang ang mga nasusugatan at karamihan ay mga inosenteng bata. Inamin naman ni US President George W. Bush at British Prime Minister Tony Blair na matatagalan pa ang giyera. Nagdagdag pa ng mga sundalo ang US at Britain.
Pero nasaan ang WMD na unang dahilan ng US kaya sinalakay ang Iraq? Bakit hindi makita ng sopistikadong gamit ng US at Britain? Kung walang WMD ang Iraq, malaking kahihiyan ang mangyayari. Kamumuhian ang US at Britain sa ginawa nilang pagsalakay sa Iraq. At siyempre, sa pagkondena sa US, kasamang babatuhin ang Pilipinas sapagkat kasapi ng koalisyon.
Ang paghahanap sa WMD ang dapat pagbuhusan ng pansin ng koalisyon para maging makatwiran ang pakikipag-giyera sa Iraq at nang hindi maakusahang mamamatay-tao.