BMW ng chiching binuhusan ng asido ng isang congressman!

ALAM n’yo bang binuhusan ng asido ang magarang BMW ng isang chiching matapos siyang makipag-break sa isang congressman?

Ayon sa aking bubuwit, happy birthday muna kay dating Vice Mayor Pacifico "Pike" Santos ng Taguig, Ma. Waywaya Macalma, Col. Paul Chua at Atty. Cesar Brilliantes.

* * *

Alam n’yo bang inireklamo ng isang chiching na businesswoman ang isang congressman dahil sa ginagawang pananakot at pagbabanta nito sa kanyang buhay?

Ayon sa aking bubuwit, inireklamo na sa San Juan Police Station ang nasabing congressman dahil hindi ito tumitigil sa pangha-harass sa businesswoman na nakipaghiwalay sa kanya.

Simula nang makipaghiwalay sa kanya ang magandang businesswoman, gustong makipagbalikan si Congressman subalit ayaw namang makipagbalikan ang babae. Nang hindi makumbinsi ni Congressman ang chiching na businesswoman na makipag-reconcile sa kanya, pinagbantaan niya ito.

* * *

Ayon sa aking bubuwit, kahit ayaw na ng babae kay Congressman, nagpupumilit pa rin itong makipagbalikan. At ang malungkot pa rito, sa halip na suyuin at ligawan muli ang businesswoman, dinadaan pa nito sa takutan.

Alam n’yo ba kung bakit nagpupumilit na makipagbalikan ang congressman sa chiching? Ang chiching pala ang nagbigay ng financial support kay Congressman noong election.

* * *

Ayon sa aking bubuwit, ang unang pangha-harass ni Congressman sa chiching ay noon pang October 2002. Si Congressman at ang kanyang mga tauhan ay puwersahang pumasok sa bahay ng chiching sa BF Homes, Las Piñas City at tinangay ang mga mamahaling handbags at mga kagamitan.

Dahil tuluy-tuloy ang harassment ni Congressman sa babae, ito ay umalis sa kanyang bahay sa BF Homes at lumipat sa isang condo unit sa Greenhills, San Juan. Subalit sinundan pa rin siya doon ni Congressman at doon naman binuhusan ng asido ang kanyang silver BMW na may plakang WHP-707.

Ang congressman na inireklamo sa San Juan Police dahil sa grave threats, robbery, malicious mischief, harassment and unjust vexation ay si Congressman S.F. as in Sanggano Family ng Visayas.