Meron kaming grocery na katamtaman ang laki at ito ang aming pinagkakakitaan. Itatanong ko lang kung ang Pag-IBIG ay nagpapautang sa tulad namin? Hanggang magkano ba ang ipinahihiram ng Pag-IBIG? Ito ba ay depende sa laki at haba ng kontribusyon? Ilang taon babayaran ang loan at gaano po kalaki ang interes? – Sivel Zeugirne
Bago makapag-housing loan, kailangang ikaw ay miyembro at may 24 buwan o dalawang taong kontribusyon. Sa kaso mo, dapat kang maging miyembro sa kategorya ng self-employed. Maaaring umutang ng P150,000 pababa na may interes na 6 percent, P150,000 pataas hanggang P225,000 sa 9 percent interes, P225,000 pataas hanggang P500,000 - 10 percent at P500,000 hanggang P2,000,000 sa 12 percent interes. Ang halaga po ng mauutang ay depende sa inyong kakayahang magbayad at sa halaga ng lupa o bahay na iyong bibilhin o ipatatayo. Ang haba ng panahon na inyong pagbabayad ay depende sa halaga ng inyong loan, maaaring ito ay 20 o 30 taon.
Ipinapayo ko na makipag-ugnayan ka sa Marketing Division (Membership) sa telepono bilang 811-40-14 para sa detalye ng pagiging miyembro ng Pag-IBIG. Maaari ka ring tumawag sa Housing Loan Originations Group, tel. numbers 811-41-94 at 811-4269 para sa mga detalye ng housing loan.