Ako at ilan sa aking mga kasosyo sa negosyo ay nagpatayo ng subdivision sa Laguna. Ang target naming kliyente ay mga empleyado ng gobyerno at pribadong kompanya. Maayos naman ang aming mga plano, permit at papeles subalit nagkaroon ng problema dahil kinapos ang aming pondo. Nakapagpatayo na kami ng mahigit 100 bahay subalit hindi pa matapos. Meron bang available financing para sa mga developer? Magkano ang maaaring mautang? Ano ba ang terms ng loan. – Edgardo Sarmiento
May financing na para sa mga developer ng Pag-IBIG Fund, ito ay tinatawag na developmental loan. Ito ay bahagi pa rin ng programa ng gobyerno upang matugunan ang pangangailangan sa pabahay sa pamamagitan ng pagtulong sa mga developers na magpatayo ng bahay sa aspeto ng financing.
Ang developmental loan ay maaaring gamitin sa development ng residential subdivision o pagpapatayo ng pabahay na bibilhin sa pamamagitan ng Pag-IBIG Housing Loan Program. Ang halaga ng maaaring utangin ay depende sa pangangailangan ng proyekto at hindi hihigit ng 40 percent ng production cost o hindi tataas ng P100 milyon (depende kung alin ang mas mababa). Ang interes sa pautang ay base rin sa prevailing market rate sa two-year Treasury Note plus three percent. Ang loan ay babayaran sa loob ng tatlong taon.
Para sa karagdagang detalye at impormasyon, ipadadala ko sa iyo ang primer para sa developmental loan at listahan ng mga dokumentong kailangang isumite sa Pag-IBIG.