Subalit ang Diyos ay may ibang balakin para sa kanya. Sa Pamplona, Espanya, ipinagtanggol niya ang kastilyo ng hari nang umatake ang mga Pranses. Isang bala ng kanyon ang tumama sa kanyang binti. Hindi siya namatay. Siya’y dinala sa sarili niyang kastilyo sa Loyola upang magpagaling. Siya’y masugid na mambabasa ng mga romansa. Humingi siya ng mga libro na mababasa. Subalit walang maibigay sa kanya. Ang mga nandoroong libro lamang ay tungkol sa buhay ni Jesus at isang libro na naglalaman ng buhay ng mga santo o mga taong banal.
Binasa niya ang dalawang naturang libro. Ganap siyang naakit kay Jesus. Binalik-tanaw niya ang kanyang sariling buhay na makasalanan. Napahagulgol siya nang dahil sa mga ito. Pinagpasyahan niyang gayahin ang buhay ng mga santo. Nag-ayuno siya. Nagplano siyang pumunta sa Jerusalem bilang isang pilgrimahe. Ang lahat ng mga ito’y balakin ng isang bagong nagbabagong-loob.
Habang siya’y nasa Manresa, Espanya, nakatanggap siya ng napakaraming biyaya mula sa Diyos. Nilikha at binuo niya ang Mga Banal na Pagsasanay. Ito’y isang instrumento na kanyang ginamit upang tulungan ang mga Kristiyano na ibigay nang ganap ang kanilang mga sarili sa Diyos. Sa pamamagitan ng Mga Banal na Pagsasanay, nakaakit siya ng mga kasama na sasali sa kanyang hangarin na ipalaganap ang paghahari ng Diyos. Ang pinakakilala sa mga ito ay si San Francisco Javier, ang apostol sa mga Indies.
Si Ignacio at kanyang mga kasama ay nagpasiyang magbuo ng isang kapatiran, isang pagsama-sama. Hiniling nila sa Papa na isugo sila saan man niya naisin silang tumungo. At binigyan nga sila ng Papa ng mga gawain. Subalit nang si Ignacio na ang umupo bilang Heneral ng mga Heswita, iniatang ng Papa kay Ignacio ang tungkulin na magsugo sa mga Heswita kung saan sila mas higit na kinakailangan.
Ang mga Heswita ay naparito sa Pilipinas kasing-aga ng 1581 – mga 25 taon pagkatapos mamatay si Ignacio noong 1556. Sa Pilipinas, pinamamahalaan ng mga Heswita ang mga Ateneo – Ateneo de Davao, Ateneo de Zamboanga, Xavier University sa Cagayan de Oro, Ateneo de Naga, Xavier School at Ateneo de Manila at Ateneo Professional Schools. Pinangangasiwaan din nila ang Manila Observatory.
Ako rin ay isang Heswita na nagtataguyod ng active non-violence o ‘‘alay-dangal,’’ at nagsusulat ng kolum na ito para Pilipino Star NGAYON, ang inyong pahayagan.