Sa unang State of the Nation Address (SONA) ni President Gloria Macapagal-Arroyo, napokus ang mga mata niya at atensiyon sa tatlong batang taga-Payatas. Ang unang bahagi ng SONA ni GMA ay binigkas niya sa Filipino. Kakaiba ang SONA niya may isang taon na ang nakararaan sapagkat naroon ang tatlong batang sina Jomar Pabalan, Jayson Banogan at Erwin Dolera. Ayon kay GMA sumulat sa kanya ang tatlo at ang mga kahilingan ay isinulat sa bangkang papel. Pinaanod nila ang mga iyon sa Ilog Pasig patungo sa Malacañang.
Ang sulat ni Jomar kay GMA, "Sana po ay mabigyan ng permanenteng trabaho ang tatay ko para hindi siya mahirapan."
Ang sulat ni Jason: "Sana po matulungan ninyo ako na makatapos sa pag-aaral hanggang kolehiyo, kasi po ang nagpapaaral sa akin ay ang lola ko lamang."
Ang sulat ni Erwin: "Ipasara ang Payatas dumpsite, at bigyan ng lupa ang aking pamilya."
Kakaiba ang introduction ng SONA ni GMA, naka-pokus sa kawalang trabaho, pagkain at edukasyon. Kahit na hindi gumamit ng tatlong mahihirap na bata, ang problema ay madaling makikita. Marami ang walang trabaho, marami ang sumasala sa pagkain at marami ang hindi nakapagkakamit ng edukasyon. Ang ganitong problema ay matagal nang nananalasa sa maraming Pinoy. Hindi lamang sa mga taga-Payatas kundi sa mga liblib na barangay.
Bukod sa mga problemang inihain ng tatlong bata, ang problema sa kriminalidad, talamak na droga at katiwalian sa gobyerno ay patuloy pa rin. Isang taon na ang lumipas at walang pagbabago sa mga nasabi sa SONA. Sinasabi ng maraming nabago, pero bakit hindi madama at marami ang nasa kumunoy ng kahirapan. Marami pa rin ang walang pagkain sa kanilang hapag at marami ang nagugutom. Sa pinaka-latest na Social Weather Stations (SWS) survey nasabi na tumaas ang antas ng mga nagugutom.
Bagong SONA ang inilahad ni GMA kahapon, hihintayin natin ang isa pang taon at saka natin suriin ang kanyang inilahad – kung nagkaroon ng katuparan.