Kamakailan muli akong nabagabag ng isang TV ad tungkol sa amasona na may hawak na latigo at pinarurusahan ang mga lalaking bilanggo sa madilim na kastilyo. Isang guwapong modelo na bagamat nakatanikala at naka-boxer shorts lang ay nakuha pang magpabango at nabighani sa kanya ang sadistang amasona. Kinaladkad ang guwapong bilanggo tapos isinara ang mabigat na pinto at narinig ang sound effects ng hagupit ng latigo kasabay ang ungol ng babae na wari’y labis na nasisiyahan habang siya’y hinahagupit at niroromansa.
Isang bata ang nagtanong bakit umuungol at hinahagupit ang amasona. Napaka-suggestive at malaswa ang dating ng naturang komersiyal kaya muling nananawagan ang BANTAY KAPWA sa mga kinauukulan tungkol sa TV ad na ito.
Isa pang dapat na i-ban ay ang awitin na sobrang malaswa ang mensahe na hindi dapat mapakinggan sa radyo, lalo na ng mga kabataan. Malisyoso ang kanta na nagsasabi na isa pang ‘‘quickie,’’ bitin si honey.’’ Bukod sa bastos ang lyrics hinaluan pa ng daing ng babae na animo’y nakikipagtalik.
Dapat na aksyunan ang mga ganitong awitin na masamang impluwensiya sa mga kabataan.