Empleyado na gustong magkabahay

Dear Sec. Mike Defensor,

Ako po ay 46-anyos, may-asawa at limang anak. Ako po ay empleyado sa isang pribadong kompanya at anim na taon nang miyembro ng Pag-IBIG. Regular po ang aking kontribusyon. Nais ko pong magkabahay at lupa sa pamamagitan ng Pag-IBIG Housing Loan Program.

Gusto ko pong itanong kung may programang pabahay at lupa ang Pag-IBIG dito sa Dagupan City. –CARLOS P. DEL PILAR

Kung anim na taon ka nang miyembro ng Pag-IBIG, sapat na ang dami ng iyong buwanang kontribusyon upang makapag-housing loan. Sapagkat 24 na buwanang kontribusyon lamang ang kailangan bago makautang sa Pag-IBIG.

Ang papel ng Pag-IBIG sa programang pabahay at palupa ay sa larangan ng financing. Ang ibig sabihin nito ay nagpapautang ang Pag-IBIG sa mga miyembro nito upang makabili ng lupa’t bahay o bahay at lupa lamang. Meron ding multi-purpose loan. Ibig sabihin nito, hindi direktang nagpapatayo ng bahay ang Pag-IBIG at hindi rin ito direktang nagde-develop ng mga subdivisions. Ang Pag-IBIG ay tumutulong sa end-user o mga miyembro nito at sa private sector o sa mga developers sa pamamagitan ng developmental loan na ginagamit sa pagpapatayo ng mga subdivisions, condominiums o medium-rise buildings.

Ayon sa Pag-IBIG Dagupan Extension Office, may mga developers na nabigyan ng developmental loans sa Pangasinan ngunit ang mga projects na ito ay matatagpuan sa Urdaneta at Pozorrubio. Maari kang magsadya o makipag-ugnayan sa Pag-IBIG Dagupan Extension Office 2nd Floor, Siapno Bldg., Perez St., cor. Rizal St., Dagupan City (tel. no. (075) 515-3572, upang maantabayanan mo ang mga proyekto diyan sa Dagupan na ipapasok sa developmental loans.

* * *

Para sa mga katanungan ipadala ang inyong mga liham sa Office of the Chairman, Housing and Urban Development Coordinating Council, 6th Floor, Makati Avenue, Makati City. Pakilagay lamang kung gusto ninyong ilathala ang inyong mga liham sa column na ito. Maraming salamat.