Paging Loren and Noli

Maganda at napapanahon ang topic ni Sen. Noli de Castro sa kanyang Magandang Gabi Bayan noong Sabado. Ito’y ayuda sa puspusang kampanya ni Sen. Loren Legarda Leviste laban sa tinatawag na e-mail order bride.

Talagang kalunus-lunos ang lahing Pilipina na nagpapaanunsyo sa website upang makakita ng Kanong magpapakasal sa kanila. Iisa ang dahilan: economic security and the chance to migrate to a land "flowing with milk and honey."

Mayroon nang batas laban sa mail order bride pero hindi sumasaklaw sa nauusong email order bride ngayon.

But then, kahit ilang taon na ang batas laban sa mail order bride, wala ni isang na-prosecute upang papanagutin sa ganitong krimen. Kasi walang complainant.

Ang hirap sa lisyang gawaing ito, walang nagrereklamo, kasi ang mga biktima ay kusang loob na nagpapabiktima. That is the problem.

At paano matatawag na krimen ang pagsusulong ng ambisyong umasenso sa pamamagitan ng pag-aasawa ng dayuhan. Kailan pa naging krimen ang pagpapakasal sa dayuhan?

But that is not the point. The issue is, lubhang naaalipusta ang imahe ng Pilipinas. Para bang ang ating mga kababaihan ay ibinebenta nating parang bibingka.

I just realized that the solution to this problem is not to outlaw any activity but to address the dire economic situation prevailing in our country.

Isipin na lang na dahil sa kahirapan ng buhay, kahit yung mga nagtapos ng kurso sa kolehiyo ay napupuwersang magtrabaho bilang gro.

Ang pagpapaanunsyo ng mga kababaihan sa website ay hindi pa lubhang kahiya-hiya.

Walang kaibhan ito sa "wanted penpal" section ng mga pahayagan at magazine. Dangan nga lamang, ito’y dumaraan sa internet at nasasagap sa ibang bansa tulad ng Amerika. "Hi-tech," kumbaga.

Kung tutuusin, mas maraming Amerikana (puti at itim) na naka-advertise sa website sa mga mahahalay na postura. Nakabuyangyang ang kanilang mga alaga na ibinebenta sa mga sex-hungry internet browsers.

Ang may control sa website ay sumisingil ng bayad sa mga interesadong kliyente na gustong kunin ang address ng mga kababaihang nakaanunsyo.

Ibigin man ng gobyerno na pag-usigin ang operator ng mga webpages na ito, hindi magawa porke ang mga ito’y naka-base sa ibang bansa.

Kunsabagay may mga nakapag-asawa ng dayuhan sa pamamagitan ng website na sinuwerte. Pero hindi puwedeng balewalain yung maraming babaeng napahamak. Yung mga minamal-trato ng mga sadistang napangasawa. Kung minsa’y pinapatay pa para makakubra ng insurance.

Suggestion kina Kabayan at Sen. Loren, tutal nasa telebisyon kayo pareho, mag-produce kayo ng true to life drama anthology na tumatalakay sa masasaklap na kapalaran ng mga kababaihang nag-asawa ng dayuhan sa pamamagitan ng email. Baka sakaling masindak yung ilang kababayan nating Pinay na gustong mai-anunsyo sa email.

But to outlaw email order bride is like reaching for the stars. Quixotic. Suntok sa buwan.