Buta nga pagtuman sa sugo

Dunay duha ka balita sa nangaging mga adlaw nga mopahinumdom nga dili makaayo sa mga sakop nga motuman bisan unsay isugo sa kadagkoan:

Lima ka sakop sa Bids and Awards Committee (BAC) sa Cebu City Hall gitaktak sa Ombudsman uban sa nataktak nang daan nga si kanhi Mayor Mike Rama kay gipasanginlang nitugot og mga kontratang walay subasta; ug

Kapin 400 ka polis nangapriso, nataktak, o nasuspenso tungod sa pagtuman sa sugo ni kanhi presidente Rodrigo Duterte sa laktod nga pinatyanay sa drug war.

Pipila sa nataktak nga mga opisyal sa City Hall hinog na og edad ug maglisod pagpangita og laing trabaho. Ambot duna bay mga kompaniya nga mosalig kon mahibawo sa seryusong pasangil batok nila. Maka-apelar sila sa desisyon. Ambot tabangan ba sa mga abogado ni Rama sa pagdangop sa labawng mga korte.

Hinaot nga dili sila mapareha sa mga polis nga nituo sa pasalig ni Duterte nga siyay modupa kon makasohan sila. Walay nadawat nga bisan unsang tabang ang mga polis ug ang nagkalisudlisod nga mga sakop sa ilang pamilya nga walay laing gisaligan gawas sa ilang suholan ug benepisyo.

Makaiban ba sa kahasol sa mga nataktak sa City Hall nga mas unang napalagpot si Rama? Makapagaan ba sa kabalaka sa mga polis nga ang kanhi presidente, bisan wala mopakita og timaan pagtuman sa iyang saad, nabalhog ug walay klaro makagawas pa ba sa prisohan sa International Criminal Court (ICC) sa The Hague?

Hinaot nga ning ilang kalbaryo taliwala sa Kuwaresma makaamgo silang Rama ug Duterte sa mga nag-antos sa ilang binuhatan.

Dili makaginhawa og luag ang ubang mga sinugo nilang Rama ug Duterte nga wala pa ma-imbestigar. Mahimong malilian sab ang ilang mga kaso sa pagpangabuso. Ang pagkataktak ni Rama ug pagkapriso ni Duterte wala mopapas sa responsibilidad sa mga nagpakabuta pagsunod nila.

Ambot unsa katakos ang mga liderato sa City Hall ug sa Malacañang sa pagpaningil sa tanang nakigkonsabo sa pagpanlaktod. Aron dili na sundon sa ubang mga sakop ug kadagkoan, ug aron mahimong pasidaan sa mosunod nga mga administrasyon, angay lang nga manubag ang tanang nakalapas sa mga lagda ug nagbudhi sa pagsalig sa katawhan.