Sugod na gyud!

Ugmang adlawa, Biyernes, magsugod na gyud ang official campaign period sa mga kandidato nga nagpapili og katungdanan sa kagamhanan alang sa eleksyon karong Mayo 12.

Alegre na gyud ni kaayo kay ang Commission on Elections (Comelec) duna na unya’y katungod sa mga kandidato nga malapason sa balaod aron ilang himoan og aksyon.

Samtang ang uban nagsige na’g suroy sa kabarangayan ug hilom nga nangampanya, duna gyuy mga kandidato nga matinumanon sa balaod, ug diha ko midayeg kanila.

Usa sa akong nahibaw-an nga mituman gyud sa balaod, mao si Vice Governor Junjun Davide nga karon nagpapili pagka kongresista sa 2nd Congressional District sa Cebu, nga naglangkob sa mga lungsod sa Argao, Dalaguete, Alcoy, Boljoon, Oslob, Santander ug Samboan.

Ang usa ka mayor diha sa 2nd district nga bag-o nakong naamigo, mihatag nako sa contact number ni Davide. Giteksan nako niadtong miaging adlaw kon asa ang ilang schedules nga maghimo sila’g pulong-pulong.

Sus, mi-reply gyud tawon si Davide nako kay nagpaila man ko nga media, ug giingnan ko niya nga wa pa sila magsugod sa paghimo’g mga pangampanya kay ugma pa kuno.

Wow, nakaingon ko nga pagka matinumanon sa balaod niining Davide uy. Ang tinuod, ang Comelec miingon man nga dili sila makapugong kon ang mga kandidato mohimo’g sayo nga pangampanya kay wa pa silay katungod kanila.

Nasayran nako gikan mismo ni Davide nga ugma pa diay sa gabii ang ilang campaign rally ug anha kini himoa sa lungsod sa Argao, nga mao sab ang iyang pinuy-anan.

Ang mga tawo nga sama ni Davide, nga matinumanon sa balaod, angay gyud nga suportahan sa katawhan. Usa ka tawo nga mahadlokon sa paghimo og supak sa balaod.

Tingali usa sa iyang gitamod nga anak siya sa kanhi Supreme Court Chief Justice, ug dili maayo nga siya ang pag-una-una sa paglapas sa balaod, ilabi na nga usa usab siya ka abogado.

* * *

Dinhi sa Cebu City, dugay ra nga ang mga politiko sa lainlaing partido ug mga grupo, naghimo sa ilang pagpangampanya. Suroy sa lainlaing dapit sa buntag aron manglamano sa mga lumolupyo.

Inigka gabii, anha sila magpulong-pulong ug mohimo’g diskurso sa dapit nga diin sila manglamano. Apan kon magsugod na ang official campaign period, matangtang na gyud kining dagko kaayong mga tarpaulin nga anaa ang nawong sa mga kandidato.

Kon dili nila kini pangtangtangon, basin og dunay moreklamo ug magka problema na hinoon sila. Busa mentras sayo pa, maayong hinay-hinayan na ninyo sa pagpanangtang ang mga dagkong tarpaulin, ug ihatag nako aron akong gamiton.