INC nakalapas sa balaod

Naabtan ang Iglesia ni Cristo (INC) og kapin sa duha ka buwan una nakapagawas og laing mensahe parte sa gobyerno human sa ilang protesta batok sa impeachment ni Bise Presidente Sara Duterte niadtong Enero 13:

•Nagpakahilom sila dihang gisalikway sa makabungog nga mayoriya sa House of Representatives ang ilang demanda pinaagi sa pag-impeach sa bise presidente niadtong Pebrero 5; pero

•Gibuak ang ilang kahilom dul-an duha ka semana human gidakop si kanhi presidente Rodrigo Duterte niadtong Marso 11 ug gibalhog sa prisohan sa The Hague sa Netherlands niadtong Marso 12.

***

Sa daghang naglibutlibot nga linya sa opisyal nga pamahayag nga giluwatan sa ilang tigpamaba, giklaro sa INC ang panginahanglan sa pagtahud sa balaod aron nga dili magkaguliyang ug mabuakbuak ang nasud.

Nga hanig sa ilang deklarasyon, nga wala magtagad paghisgot og bisan unsang sukaranan, nga kalapasan sa balaod ang pagsurender sa administrasyon ni Presidente Ferdinand Marcos Jr. (nga wala sab nila hisguti) sa kanhi presidente ngadto sa International Criminal Court (ICC). Niinsistir sila nga ang bisan unsang mga pasangil batok ni Duterte angayng husayon sa lokal nga mga korte.

***

Gisalikway sa INC ang pagpasabot sa mga opisyal sa gobyerno, nga naglakip sa ilang sakop nga si Heneral Nicolas Torre, nga ang pagdakop ni Duterte:

•Pinasubay sa International Humanitarian Law (Republic Act. No. 9851) nga nagsugo sa Pilipinas sa pagtabang sa kalibotanong mga korte sama sa ICC; ug

•Nitakdo sa desisyon sa Korte Suprema niadtong 2021 nga bisan nigawas nang Pilipinas nagpabilin ang hurisdiksiyon sa ICC sa mga krimen dinhi sukad 2011 hangtod 2019.

***

Hinaot maminaw ang INC sa abogado nilang mga sakop nga gisugo sa 1987 Constitution nga kon dunay impeachment complaint, kinahanglang lihukon dayon sa House. Kon dasonan sa labing menos ? sa mga kongresista (sobra sa ¾ ang ni-impeach sa bise presidente), kinahanglang himuon dayon ang impeachment trial (nga giyak-an ni Senate President Chiz Escudero).

Kon matinud-anon ang INC pagpatigbabaw sa balaod, angay silang moapil pag-apura sa mga senador pagtuman sa ilang trabaho. Ug angay silang mangayo og pasaylo sa kawsa sa ilang protesta niadtong Enero 13. Kay base sa ilang kaugalingong deklarasyon nakalapas sila sa balaod. Ug nakamugna og kaguliyang ug pagka-buak-buak.