26th Ornopia Cup kasado na karong Abril 13 sa Calambua

CEBU, Philippines — Andam na ang tanan alang sa 26th Ornopia Cup motocross race nga gikatakda karong Abril 13 didto sa MS Motosuit Motorsports Park sa Barangay Calambua, lungsod sa San Remigio amihanang bahin sa Sugbo.

Si MS Motosuit big boss Lou Ornopia, nga maoy nag-establisar ning labing karaan nga karera sa motocross dinhi sa probinsiya niadtong 1997, nagkanayon nga usa sa mohatag og kinabuhi sa giatngan nilang kalihukan mao ang pagpasidungog sa pamilyang Ornopia ug uban pa nilang tigpaluyo nga nakatabang og dako pagkab-ot sa ilang nahimutangan karon.

"Dili man seguro malalis nga mao ni ang labing dugay nga lumba dinhi sa Sugbo maski na gani sa tibuok Pilipinas," matud pa ni Ornopia,  ang giyukboang amahan sa Cebu motocross nga gibayaw kanhi nga  Sportsman of the Year sa Sportswriters Association of Cebu (SAC).

"Way laing nakahimo niini kita ra gyud mao nang angayan lamang natong pasalamatan ug pasidunggan ang mga nagpaluyo ning atong lumba matag tuig ilabi na ang Ornopia family kay kon wala ni sila, dili nato maabot kining gidugayon sa paghatag og kalingawan sa mga Sugbuanon," dugang pa ni Ornopia.

Balik lantaw sa kagahapon, ang konsehal sa San Remigio mapasigarbuhon nga ang Ornopia Cup nahimong hulmahanan sa pipila ka mga racing legends sa nasud sama nilang Pepo ug Popeye Rubi, Irwin Uypitching, Jon-jon Adlawan, Bornok Mangosong, Donkey Sanchez, Jubenile Abellar, John Flores, BJ Pepito ug uban pa.

Luyo sa abunda nilang kasaysayan pagmugna og mga kampiyon sa racing circuit, si Ornopia naghinaut nga makadiskubre sila og bag-ong mga talento sa umaabot nilang pasundayag nga kabahin sa selebrasyon sa tinuig nga pista sa Calambua agi'g pagtamod sa minahal nilang patron nga si San Vicente Ferrer.

Mga tadhang riders gikan sa nagkadaiyang dapit sa Kabisay-an ug Mindanao ang mopakita'g aksiyon sa umaabot nga kompetisyon nga naglangkob og beginners ngadto sa expert ug pro category.

Gawas sa ganting salapi, si Ornopia mibutyag nga duna silay giandam nga daghang mga giveaways ug papremyo sa raffle dili lamang alang sa mga partisipante apan hasta na sab sa mga manan-aw.

"Among seguradoon nga kulbahinam ug makalingaw ang atong kompetisyon. Gusto nako nga malipay ang tanan, magmabulokon ug dili mahikalimtan kining atong kalihukan," panapos pa ni Ornopia.