Pakauwaw sa Senado
Napakyas ang tanang pagsuway pag-usab sa 1987 Constitution. Tungod sa pagsupak sa Senado, napakyas ang mga kampanya sa charter change (cha-cha) tanang presidente sukad ni Fidel Ramos hangtod ni Ferdinand Marcos Jr. (gawas ni anhing Noynoy Aquino nga wala mangambisyon paglugway sa iyang termino).
Nabasura sang kampanya sa cha-cha ni House Speaker Martin Romualdez sa niaging tuig. Dili lang tungod sa pagbabag sa mga senador kon dili tungod sa pagsalikway sa publiko sa plano nga pinaagi sa hiniusang botasyon, suyupon sa kapin sa 300 ka kongresista ang 24 ka senador.
***
Sa niaging tulo ka dekada, nisalig ang katawhan sa Senado sa pagbaraw sa maniobra pagwatas-watas sa konstitusyon aron mopilit sa gahom ug makapahimulos og mas daghang pabor ang mga hakog nga nagtungkawo sa gahom.
Ambot maangkon pa ba sa mga senador ang samang suporta human sa ilang mga pakauwaw. Nga nakapapugwat sa mga botante nga hasta ang Senado gidominahan sa politikanhong mga dinastiya ug sa mga artista nga walay nakamaohan. Nga ang Senado wala diay kalainan sa Malacañang ug House of Representatives nga nipalabi sa personal nga mga interes.
***
Pipila sa mga pakauwaw sa mga senador:
• Gipatuyangan nilang mga balikas ug bakak ni kanhi presidente Rodrigo Duterte sa public hearing sa Blue Ribbon Subcommittee sa extrajudicial killings (nga gidalidali paglusad tungod sa kasina sa mas popular nga imbestigasyon sa House Quad Committee) sa Oktubre sa niaging tuig;
• Tungod sa diktasyon sa House ug Malacañang, giaprobahan nilang Maharlika Investment Fund bill, bisan nagkasungi ang mga probisyon, sa kadlawong dako niadtong Mayo 2023;
***
• Sa niaging buwan, giaprobahan nilang Filipino citizenship sa usa ka Chinese citizen bisan sa mga dokumentong napakita ni Senador Risa Hontiveros nga mahimong nahilambigit sa ilegal nga Philippine Offshore Gaming Operators (POGOs);
• Sa niaging semana, gipasidunggan nila si kanhi presidente Joseph Estrada nga nakonbikto og plunder niadtong 2007; ug
• Gi-adjourn ang ilang sesyon niadtong Miyerkules sa walay pagtuki sa nasumiter na sa House nga articles of impeachment batok ni Bise Presidente Sara Duterte ug niinsistir nga mobakasyon sa mosunod nga upat ka buwan imbes tumanon ang klarong sugo sa Konstitusyon sa paghimo og impeachment trial sa labing dali nga panahon.
- Latest
