Mas dako ang kawsa

Nagkinto ang mga lider sa oposisyon ni kanhi Senador Sonny Trillanes. Dako ang iyang papel, gani usa siya sa labing isog, sa pakigbisog batok ni kanhi Presidente Rodrigo Duterte. Pero dili sila ganahan sa iyang pagsuporta sa administrasyon ni Presidente Ferdinand Marcos Jr.

Diplomatikanhon nilang gibalibaran ang awhag ni Trillanes sa pakig-alyansa sa Malakanyang batok sa mga Duterte. Nahilot ang iyang pagkuwestiyon sa pagpadayon ni kanhi Bise Presidente Leni Robredo ni Bise Presidente Sara Duterte sa iyang balay sa Naga City. Ambot mahusay bang ilang bangga sa rally ugma, Biyernes.

-o0o-

Ang orihinal nga pahibawo sa Clergy and Citizens for Good Governance (CCGG), ang tigpasiugda sa rally ugma, Enero 31, mao nga magprotesta sila para sa impeachment ni Duterte ug batok sa pagmaniobra sa 2025 budget. Gilista ang Magdalo party-list ni Trillanes nga usa sa motambong sa kalihokan.

Ang unang imbitasyon ni Trillanes sa publiko naghisgot lang sa impeachment. Mas kontrobersiyal ang ikaduha niyang notisya: Gibuwag ang iyang impeachment rally sa buntag gikan sa rally sa hapon sa CCGG nga iyang gipasanginlang nasudlan sa mga dumadapig ni kanhi Presidente Duterte.

-o0o-

Pasiunang reaksiyon sa CCGG sa pasangil mao ang pagpasalig nga wala sila masudli sa DDS (diehard Duterte supporters) ug nga andam nga makigsulti ni Trillanes aron pagpasabot nga dili mahimong buwagon ang impeachment gikan sa budget ug ubang pangurakot.

Pipila ka mga lider sa oposisyon nipakalma sa sitwasyon pinaagi sa pagsaad nga motambong sa rally ni Trillanes sa People Power Monument ugma sa buntag ug motambong sab sa rally sa CCGG sa Edsa Shrine ugma sa hapon.

-o0o-

Hinaot makumbinser nila si Trillanes nga kinahanglang managsama nga batokan ang kahiwian nilang Duterte ug Marcos. Nga ang pakig-alyansa ni Marcos dili garantiya nga matumba ang mga Duterte. Ang nukos-nukos sa presidente sa impeachment maoy pahinumdom nga dili siya kasaligan.

Salamat sa mga paningkamot ni Trillanes sa pagtabang pagsumiter og mga ebidensiya batok sa mga Duterte sa International Criminal Court (ICC) ug pagpasaka og mga kasong kriminal batok nila sa Ombudsman ug Department of Justice (DOJ). Pero ang kawsa batok sa kahiwian, ma-Marcos o ma-Duterte man, mas dako pa niya. Ug magpadayon bisan sa sukwahi niyang tan-aw.

[email protected]