Budget ug impeachment
Wala mangambisyon ang mga tigpasiugda nga labwan ang nagtapok nga mga sakop sa Iglesia ni Cristo (INC) niadtong Enero 13, pero mas klaro ang mga tuyo sa rally karong Biyernes, Enero 31, sa EDSA Shrine nga pasiugdahan sa Clergy and Citizens for Good Governance (CCGC):
•Pagprotesta batok sa administrasyon ni Presidente Ferdinand Marcos Jr. tungod sa pagmaniobra sa 2025 budget; ug
•Pag-apura sa mga liderato sa House of Representatives ug Senado sa pagtuman sa ilang katungdanan ubos sa 1987 Constitution sa pag-atiman sa impeachment complaints batok ni Bise Presidente Sara Duterte.
* * *
Giimbitar sa CCGC ang tanang nagpakabana nga mga Pilipino, bisan unsay ilang relihiyon o politikanhong grupo, sa pag-apil sa kalihokan. Nakadawat na sila og suporta sa 12 ka Catholic bishops, tulo ka Evangelical bishops, 230 ka pari, gatosan ka military ug uniformed personnel, ug 54 ka civil society groups and youth organizations.
Motambong silang retired Supreme Court senior associate justice Antonio Carpio, kanhi Information Communications Technology undersecretary Eliseo Rio Jr., kanhi presidential adviser Ronald Llamas, kanhi Finance undersecretary Cielo Magno, ug kanhi Commission on Audit commissioner Heidi Mendoza.
* * *
Managlahi hinuon ang mga panglantaw sa pipila ka grupo nga nisaad pag-apil sa kalihokan:
•Mga dumadapig sa mga Duterte nihatag og kundisyon nga motambong sila (sa ato pa, mosakay sila sa rally) kon dili i-apil ang impeachment sa bise presidente; samtang
•Grupo ni kanhi senador Sonny Trillanes, nga nisuway pero napakyas pagtukod og alyansa sa oposisyon ug Malacañang, niawhag nga impeachment ni Duterte ray tukion sa rally ug dili sagolan sa kontrobersiya sa budget.
* * *
Dunay panghunahuna nga unahon sa paghipos ang mga Duterte kay mas seryuso silang hulga (palandonga unsay atong dangatan kon makabalik sila sa Malacañang). Unya na lang tukion ang mga pasangil sa pangurakot batok nilang Marcos Jr. ug House Speaker Martin Romualdez.
Uyon ko nga sa labing daling panahon angayng palagputon ang bise presidente ug ikiha si kanhi presidente Rodrigo Duterte. Pero kon lingiwan ang mga kawat sa administrasyon, mora ra ta nga nihatag og lisensiya nilang Marcos ug Romualdez sa pagbasiyo sa atong nasudnong panudlanan. Samtang gihadlok ta nila sa bangis nga mga krimen nga gipasangil batok sa mga Duterte.
- Latest
