Paukyab ba lang ang ICC?

Samtang daghang nihangop sa pahibawo ni Justice Secretary Boying Remulla nga nausab nang baruganan sa administrasyon ni Presidente Ferdinand Marcos Jr. sa International Criminal Court (ICC) --gikan sa pagsalikway kaniadto ngadto sa pakigtinabangay na karon-- kasagaran nabalaka nga ang mensahe lain na sang paukyab.

Walay makabasol nila. Human gipakita sa mga ebidensiya sa pagwaldas sa confidential funds ni Bise Presidente Sara Duterte ug gipasaligan nga ikiha siya og plunder ug palagputon pinaagi sa impeachment, aron lang mabawo pinaagi sa pagyaka sa impeachment complaints, duna silay tanang sukaranan sa pagduda ning administrasyona.

* * *

Unsa ba tuod kaseryuso ang Malacañang sa pakigsulti sa ICC? Pagpalig-on sa pasangil sa crimes against humanity batok ni kanhi presidente Rodrigo Duterte nga gi-imbestigar sa ICC sulod na sa siyam ka tuig ug sa mga kasong ipasaka sab sa Department of Justice (DOJ)?

Dili ba ni, sama sa hulga sa impeachment, paukyab lang? Aron paglipat sa publiko gikan sa nabistong mga eskandalo sa 2025 budget? Aron mawaling pagbalik ang atensiyon sa publiko ngadto sa mga krimen nga gipasangil batok sa kanhi presidente ug ni Bise Presidente Sara Duterte?

* * *

Tinuod, gihangop sa katawhan sa mga imbestigasyon sa House of Representatives nga nakahipos og mga ebidensiya sa extrajudicial killings sa amahan ug pangurakot sa anak. Pero wala ni magpasabot nga lingiwan lang nila ang mga pasangil sa mas grabeng kawat sa administrasyong Marcos.

Ang nagpakabana nga mga magbubuhis mobaraw sa mga transaksiyon sa pag-usik-usik sa kuwarta nga ilang hinagoan. Bisan kinsay responsable: Amahan ug anak nga Duterte o manag-agawng Marcos ug House Speaker Martin Romualdez.

* * *

Kon masaligon silang Marcos ug Romualdez ug mga alyado nga ila ang tanang alas ug nga duna silay tanang panahon sa pagpahagsa sa mga Duterte, maong nagtuo nga mahimo rang langayon ang impeachment hangtod sa liwas sa eleksiyon karong Mayo, peligrong nasobrahan ang ilang kumpiyansa.

Kay duna silay giliwatan. Sama sa ilang mga ginikanan, suma sa ilang pagmaniobra sa budget, dili silang kapugong sa pagsurikbot sa nasudnong panudlanan. Kon mabisto ang dugang nilang mga pakauwaw, segurong sakyan ug gamiton sa mga Duterte. Nga kon makabalik sa Malacañang, mahimong dili sama kalangayan sa paghurot sa ilang mga karibal.