Sinulog Cup 2025 Basketball Tournament mo-arangkada na

CEBU, Philippines — Ang Sinulog Cup 2025 Basketball Tournament mosikad na diin duha ka duwa ang kumbatihan karong adlawa diha sa Cebu Coliseum.

Si Cebu City Vice Mayor Dondon Hontiveros mipahibawo atol sa usa ka press conference kagahapong adlawa didto sa Ssamthing Korean sa Baseline Center nga lima ka teams ang mopakita'g aksiyon ning unom ka adlaw nga torneyo nga libre ug abli sa publiko.

Giduyogan siya nilang commissioner Atty. Jave Mike Aton, deputy commissioner Jonathan Saso ug representante sa mga partisipanteng koponan.

Sa makapa-interes nga impormasyon, ang kampiyonato sa Sinulog Cup duwaon usa ka adlaw human ang usa ka semanang 1st Mayor Raymond Garcia Invitational Basketball Tournament magsugod diha sa Cebu City Sports Institute Gym sa Barangay Sawang Calero. Kalma ra hinoon nga gilantaw ni Hontiveros ang sitwasyon bisan og klaro kaayo nga ang duha ka managlahing kalihukan sa paugnat kusog nga giorganisa sa nanagbangi nga mga grupo diha City Hall adunay pulitikanhong kolor.

"It's good for the players nga daghan og liga ug taas-taas ang adlaw nga naa sila'y duwa," matud pa ni Hontiveros.

Sa laing bahin, ang Welec Trucking Services mosakbang batok sa Team Frasco sa Liloan sa pasiunang duwa sa alas-6 sa gabii samtang ang University of Cebu (UC) Webmasters makigharong sa Cebu City selection nga gilangkoban og mga players gikan sa Sugbo Cup sa main game sa alas 7:30 sa gabii.

Ang bisitang RKF Iloilo mobanat sa ikaduhang adlaw pa sa kompetisyon.

Ang mga entrante moduwa og single round robin diin ang Top 2 teams maoy mag-ilog sa korona sa usa ka knockout match.

Ang makampiyon mobulsa og P200,000, samtang ang first runner-up makadawat og P100,000. Ang mopahiluna sa ikatulo ngadto sa ikalimang dapit mokubra og P50,000, P25,000 ug P10,000.