Alas ni Marcos
Ang bag-ong buslot nga nakit-an ni kanhi presidente Rodrigo Duterte sa 2025 budget maoy pahinumdom sa administrasyon ni Presidente Ferdinand Marcos Jr. sa kadako sa risgo sa paglangay sa impeachment ni Bise Presidente Sara Duterte. Kon moinsistir si Marcos nga ang bag-ong Kongreso nga molingkod karong Hulyo nay mopalagpot sa bise presidente peligro nga siyay unang matangtang.
Kay ang mga Duterte mopahimulos sa tanang kahigayonan sa pagpalagpot niya sa Malacañang. Ug ang administrasyong Marcos napamatud-an nga walay kalainan sa ilang giliwatan: Mogamit sa tanang palusot sa pagtilok sa nasudnong panudlanan.
***
Palihug subaya ang kabanga sa administrasyon pagtabon sa maniobra sa budget:
• Human nipasalig nga sakto ang budget nga iyang gipirmahan, gihulagway sa presidente ang 2025 budget nga “suboptimal” kay gitangtangan og pundo ang importanteng mga proyekto;
• Human nanalipod sa lahap nga mga laslas bicameral conference committee sa Edukasyon, Kahimsog, Housing, Agrikultura, ug Social Services, nagkarakara ang presidente sa pagpangita og savings nga ikatapak sa mainutil nga mga programa; ug
• Human pasalamati sa presidente ang Kongreso sa sayo nga pagpasar sa budget, gitaktak si House Appropriations Committee chairman Zaldy Co.
***
Pero nahibawo tang tanan nga dili si Co ray mabasol sa blangko nga mga pahina ug ubang kuwestiyonable nga mga probisyon sa giaprobahan nga budget. Nahibawo tang tanan nga tanang maniobra nga gipasiugdahan ni Co dunay bendisyon sa iyang prinsipal nga si House Speaker Martin Romualdez.
Ug angayng pahibaw-on ang mga magbubuhis nga ang tanang kausaban sa budget nga gipalusot nilang Romualdez ug Senate President Chiz Escudero dunay bendisyon sa presidente (nga nagpa-goryo-goryo na lang tungod sa daghang pagsaway).
***
Gawas sa iyang paghisgot na sab og kudeta batok ni Marcos sa pagbisto sa buslot sa budget, nihulga si kanhi presidente Duterte sa paglusad og civil disobedience --kumbinsihon niyang katawhan sa dili pagbayad og buhis.
Angay bang mokurog si Marcos sa bag-ong pagsuway sa mga Duterte pagpalagpot niya? Angay lang. Labi na kon mabisto ang uban pa nilang lang-og nga mga transaksiyon. Pero dunay bentaha ang administrasyong Marcos. Samtang nasuko ang katawhan sa kapakyas pagpaubos sa mga presyo ug pagbadlong sa pangurakot, mas hadlok ang katawhan unsay dangatan sa nasud kon makabalik ang mga Duterte sa Malacañang.
- Latest
