Nganong mahal ang bugas
Laing pasalig sa administrasyon ni Presidente Ferdinand Marcos Jr.: Mo-us-os ang presyo sa bugas humay og ?3 ngadto sa ?5 kada kilo sugod sa sunod semana. Kanus-a gipaabot nga ideklarar sa Department of Agriculture (DA) ang food security emergency.
Nipasidaan si Marcos nga ang deklarasyon mopugos sa pagbarato sa bugas humay. Nga padayong nimahal bisan nitidlom ang presyo sa bugas humay sa Vietnam, Thailand, ug ubang kanasuran ug gilaslasan sa Malacañang ang buhis sa imported rice gikan sa 35% ngadto sa 15%. Gipasanginlan ang mga negosyante nga nagpaburot sa ilang ginansiya.
***
Kon nagtuo nga ang deklarasyon motimaan nga maposasan na sa gobyerno ang tikasan nga mga negosyante ug mabungkag ang mga sindikato, ipaubos og dyutay ang imong paglaom. Kay ang deklarasyon sa food security emergency igo lang:
•Mohatag og gahom sa National Food Authority (NFA) sa pagpagawas sa pundo nga unom ka milyon ka bugas humay gikan sa ilang mga bodega;
•Nga ibaligya sa barato kaayong presyo nga ?36 kada kilo ngadto sa mga ahensiya sa gobyerno; nga gipaabot
•Mobaligya sa bugas og ?38 kada kilo ngadto sa publiko.
***
Wala igdungog ang gobyerno nga kamaong mamaligya og bugas. Wala silay kasinatian ug walay makinarya. Ang tokar-tokar nga Kadiwa Centers, nga kinopya gikan sa nabangkarota nga programa sa diktadura ni Ferdinand Marcos Sr., wala makapabarato sa bugas humay sa nangaging mga buwan.
Ang pag-agi sa NFA rice sa mga politiko, kay kasagaran ibaligya man sa local government units, dakong tentasyon sa pamolitika --mga dumadapig ray mabusog pero magpabiling gutom ang kinabag-an sa mga konsumidor.
***
Kon kumbinsido si Marcos nga gimaniobra sa mga negosyante ang suplay ug presyo sa bugas humay, nganong igo ra mang modangop sa taphaw nga deklarasyon? Hain na man ang iyang pasidaan sa niaging duha na ka State of the Nation Address nga inihap na lang ang mga adlaw sa rice cartel?
Ang kapakyas ni Marcos pagtuman sa iyang saad sa barato ug abundang pagkaon, dul-an tulo ka tuig human nibanos sa Malacañang, makapasamot sa mga pagduda nga tinuod ang mga pasangil nga dunay direktang koneksiyon sa palasyo ang dagkong mga negosyante nga nisabotahe sa nasudnong ekonomiya.
- Latest
