EDITORYAL - Naibtag tunok

Daw naibtan og tunok ang publiko , mga nagbantay ug opisyales sa Cebu City nga nahuman ang libreng Sinulog concert diha sa Cebu City Sports Complex nga walay dautang nahitabo bisan sa kaguliyang sa sitwasyon diha sa gawas sa maong pasilidad niadtong Huwebes sa gabii.

Napuno gyud ang bleachers ug ang ubos nga bahin sa complex sa mga tawong gustong makasaksi sa maong konsiyerto. Kadaghanan mga kabataan tungod ka idolo nila ang mga singers ug banda nga nanukar.

Duha ka tuig na ang nakalabay sa dihang nagpahigayon sab og susamang konsiyerto diha sa CCSC nga gibitoonan ni AJ Raval. Mao pa kadto ang labing unang higayon nga dunay konsiyertong gihimo sa siyudad human sa Covid 19 pandemic mao nga nagdasok sab ang mga tawo.

Apan adtong hitaboa, Marso 26, 2022,  may mga kagubot nga nahitabo ug nameligro ang kaluwasan sa gibanabanang  kapin 100,000 ka mga nanan-aw.

Hinuon, bisan pa niadto, natapos nga konsiyerto nga walay nahitabo sama sa stampede nga mao gikahadlokan sa kadaghanan.

Niadtong Huwebes sa libreng Sinulog concert nagkaguliyang sab sa gawas nga bahin sa CCSC kay dunay mga nagtinukmoray sa mga nagdasok nga mga tawong wala makasulod tungod kay puno na ang venue. Samtang tuod nindot nga venue ang CCSC sa mga ingon ani nga events, naa gyud pirme ang kabalaka sa publiko tungod sa kapiot sa entrada niini diha sa dalan R.R. Landon.

Apan ang bentaha lang sab sa CCSC, nakatabang sa mga magbalantay ang kapiot sa entrada kay makontrol nila ang bul-og o duot-duot sa mga tawo kun magtinukmoray kay dili man kaayo daghan ang magdasok sa gate sa pasilidad.

Kaning mga sama niini nga kalingawan ilabi na kun libre makadugang sa kalipay panahon sa selebrasyon sa Sinulog, apan dili gyud malikayan nga dunay mga kabalaka sa kaluwasan.

Ipasalamat natong tanan sa Senyor Sto. Niño ang maong kalamposan ug mangamuyo napud para sa kalihokan karong adlawa ang fluvial procession ug ugmang adlawa ang Sinulog Grand Parade nga magmalampuson, malinawon ug sadya ang tanan.