Nukus-nukos ni Duterte

Dihang gihagit ni kanhi presidente Rodrigo Duterte ang House Quad Committee sa pagpatawag niya kay iyang tubagon ang tanan nilang pangutana ug iyang ihatag ang tanang gikinahanglan nilang kasayuran, wala siyay bisan gamay na lang nga panagana.

Dihang giawhag niya ang mga kongresista nga dili na lang hasulon ang ubang mga opisyal sa iyang administrasyon ug idiretso na lang niya ang tanan nilang pakisayod kay siya ang labing takos nga makapasabot sa iyang gilusad nga gubat batok sa ilegal nga drugas, wala siya mopahamtang og bisan unsa nga mga kundisyon.

* * *

Pero dihang giimbitar na siya sa Quadcomm para sa public hearing niadtong Oktubre 22, nikalit og kaluya ang iyang panglawas, nikalit lang og kadaghan ang iyang gimbuhaton, nikalit lang pagtumaw ang iyang panginahanglan sa pagpahuway, ug nikalit lang ang kaapiki sa panahon sa pagpangandam.

Nipasalig hinuon siya nga motunga sa sunod nga mga imbestigasyon sa upat ka komitiba nga nagdungan pag-imbestigar sa Philippine Offshore Gaming Operators (POGOs), ilegal nga drugas ug extrajudicial killings (EJKs). Mas maayo kon liwas sa Kalagkalag. Wala mopakita og problema sa paghatag sa iyang testimoniya.

* * *

Pero dihang nitambong sa imbestigasyon sa Senate Blue Ribbon subcommittee niadtong Oktubre 28, wala siya mopakita og bisan unsang timaan sa kaluya. Labaw nang wala mopasundayag og bisan gamayng lama sa paghinulsol ni kauwaw sa 35,000 ka kinabuhi nga nakalas.

Dihang gipul-an na ang mga senador og pangutana ug dihang nabulit nang ilang hawanan sa iyang mga balikas, si Duterte ang nidemanda og dugang panahon sa pagpanubag sa dugang pang mga pangutana, bahala kon maabtan sa sunod buntag.

* * *

Dihang giimbitar siya og balik sa Quadcomm sa public hearing gahapon, Huwebes, Nobyembre 7, nibalibad si Duterte kay natubag na niya ang tanang mga pangutana. Gawas pa, wala diay siyay salig sa kaligdong sa imbestigasyon kay gihudlat nang ubang resource persons.

Imbes gamiton ang kahigayonan sa pagbaraw sa giisip nga pagpanggukod sa House of Representatives batok niya ug pagbisto sa pagpamugos sa mga kongresista sa iyang mga sinaligan aron iduot siya, gipalabi ni Duterte ang paglikay na sab sa giangkon na unta nga responsibilidad sa bangis niyang mga krimen pinaagi sa --nakatag-an ka-- pagtago sa iyang moskitero sa Davao.