Engkuwentro sa Senado
Kon modayon si kanhi presidente Rodrigo Duterte pag-atubang sa Senado karong buntag, angay niyang tarungon pagtubag ang mga pasangil sa lapad nga binayranay sa laktod nga pinatyanay sa suspitsadong mga durugista atol sa iyang administrasyon.
Kay kon gamitan sa iyang naandang goryo-goryo, lipat-lipat, ug bugal-bugal, mosamot siya og kaunlod. Nagkalig-on ang mga ebidensiyang nahipos sa House Quad Committee batok niya. Kon padayong magluklok sa moskitero sa Davao, maligsan siya sa mga panghitabo. Labi na kon dugang mga sinaligan niya ang maneguro pagkumpisal sab sa pagtuman sa ilegal niyang mga sugo.
***
Human gidasonan ni retiradong koronel Edilberto Leonardo ang gibisto ni retiradong koronel Royina Garma nga pagpatuman sa “Davao template” sa tibuok nasud (nga naglakip sa cash rewards sa extrajudicial killings), nga nitakdo sab sa nahaunang testimoniya ni retiradong koronel Jovie Espenido nga legal ug ilegal ang mga tinubdan sa cash rewards, dako ang kahigayonan nga uban pang mga opisyal sa kapolisan mokanta sab.
Kay makumbinser nga modako ang kahigayonan nga mogaan ang ilang sentensiya, kon dili man mapasaylo sa ilang mga atraso, kon motabang imbes magpa-pating sa mga imbestigasyon.
***
Imbes motak-om, mahimong maaghat ang mga polis sa pagpiyait sa paggamit ni Duterte nila:
• Una, kay wala tumana ni Duterte ang pasalig nga siya ang magpakiha ug magpapriso kon apikihon ang mga polis nga igo lang nituman sa iyang sugo sa pagpatay sa gidudahang mga durugista, nisukol man sila o wala; ug
• Ikaduha, kay gamay rang kantidad nga ilang nadawat kon ikumparar sa gisulti ni Garma nga ?20,000 ngadto sa ?1 milyon kada patay.
***
Usa sa gipaabot nga makit-an sa publiko, kon dili mokakak ang kanhi presidente, mao ang labing unang panagtagbo nilang Duterte ug kanhi senador Leila de Lima sukad nagmaniobra ang kanhi administrasyon og mga ebidensiya sa pagpapriso ni De Lima kapin sa unom ka tuig nang nilabay.
Kadako sa kalainan sa mga ruta nga ilang padulngan: Si De Lima mahimong makalingkod isip kongresista kon makadaog ang bag-ong party-list group nga Mamamayang Liberal sa eleksyon sa Mayo sa sunod tuig; samtang si Duterte mahimong mabalhog sa mingawng prisohan sa International Criminal Court sa The Hague sa Netherlands.
- Latest
