Duguong sekreto ni Duterte

Mas brayt g’yud gihapon si Senador Risa Hontiveros kay nilang Senador Bato dela Rosa ug Senador Bong Go. Nga nisugyot nga sila ra sab ang mangunay sa pag-imbestigar sa ilang kaugalingon. Nga pulos gilambigit sa binayranay sa extrajudicial killings (EJKs) ni kanhi presidente Rodrigo Duterte.

Mas brayt siya kay ni Senate President Chiz Escudero ug ubang mga senador. Nga wala dayong katingog sa higanteng eskandalo nga nahunahunaan nilang dela Rosa ug Go: Aron pag-alkontra sa House Quad Committee ginamit ang Senado isip institusyon, ang mga imbestigahunon mohimo og ilang kaugalingong imbestigasyon.

***

Makalingkawas sa kauwawan ang tanang hingtungdan kon tumanon ang rekomendasyon ni Hontiveros nga ang tanang senador pinaagi sa Senate Committee of the Whole ang mo-imbestigar sa drug war ni Duterte:

•Makaikyas si Escudero sa lisod nga tahas sa pagbaraw sa walay pag-insulto sa gahom sa komitiba ni Dela Rosa sa pagbuut-buot og pangimbestigar; ug

•Maluwas silang Dela Rosa ug Go, nga segurong unongan sa ilang alyado nga wala say tarung kabuot nga si Senador Robin Padilla, sa pag-unay-unay og pangutana ug pagtubag sa ilang kaugalingon nga mga pangutana.

***

Kon tibuok Senado ang mangimbestigar, dili sila kapasanginlan nga nangopya sa mga kongresista (bisan klarong nahawongan sa imbestigasyon nga wala paabota nga nakahipos og eksplosibong mga ebidensiya ug nakabanhaw sa labing bangis nga mga kaso). Kay makapangangkon sila nga ang quad-comm lupigon sa whole-comm.

Pero kinahanglang magtuon ug moapil ang mga senador. Dili mahimong sila ra gihapong Hontiveros ug ubang kugihan ang magtikaw-tikaw. Kinahanglang ambasan kon dili man palabwan ang kalidad sa pagtuon sa batan-on ug beteranong mga imbestigador sa House.

***

Labaw sa tanan, ang Senate Committee of the Whole makaangkon sa kahigayonan pagbawi sa kauwawan nga gihimo sa mayoriya nila walo ka tuig ang nilabay:

•Kanus-a silay unang nangimbestigar sa EJKs sa Davao ug Pilipinas;

•Kanus-a silay unang naminaw sa mga testimoniya sa mga berdugo ni Duterte nga silang Edgar Matobato ug Arturo Lascañas; ug

•Kanus-a naputol ang imbestigasyon kay ang pangulo sa Senate Committee on Justice and Human Rights nga si kanhi Senador Leila de Lima gipalagpot sa 16 ka senador nga nikurog ni Duterte nga nanghudlat pagtipig sa duguong tinagoan.