Sa pagpangampanya aron makabalik sa puwesto, ang mga gitaktak nga silang Mike Rama ug Jonas Cortes makapangangkon nga gigukod sa ilang mga kontra. Dili maglisod pagkumbinser sa mga botante kay walay nakasuway og lihok sa Ombudsman nga ingon ini kapaspas.
Isip ebidensiya, mapahinumdoman ang mga botante nga natanggong pang kasong plunder nga gipasaka niadtong 2022 tungod sa kontrata sa basura nga nakapa-alkanse sa Cebu City og ?256 milyones. Giuna ang mga kaso batok ni Rama sa nepotismo (gipasaka sa 2023) ug sa pagdaugdaog sa upat ka trabahante (gipasaka karong tuiga).
***
Pero nalikayan untang kaapiki kon silang Rama ug Cortes nakabantay sa pagkausab sa huros sa politika (nga mahimong nataligam-an kay nagtuong puwerte na nilang hawora):
•Wala unta mapadpad si Rama palayo sa Malacañang kon may nakahunghong pa niya sa usa sa labing importanteng leksiyon sa politika nga dili mangahas sa pagpataliwala kon magbugno nang mga higante; ug
•Wala untay manglawgaw sa ikatulo ug kataposang termino ni Cortes kon napahimatngonan pa nga si Kongresista Lolypop Ouano dili angayng awayon kay lig-on og koneksiyon ni House Speaker Martin Romualdez.
***
Mas makatabang nilang Rama ug Cortes kon ipasabot ang kalapasan sa mga balaod nga maoy gibasehan sa Ombudsman sa pagtaktak nila. Kay madutlan sila sa mga kaso, nga seguradong sigehan og wara-wara sa ilang mga kaatbang atol sa kampanya, kon dili masagang ang mga ebidensiya sa ilang pag-abuso sa gahom:
•Nag-abuso sa gahom si Rama sa paglabay ug pagputol sa suweldo sa upat ka trabahante sa Cebu City Assessor’s Office ug pagpanghunaw nga wala siya labot sa desisyon dihang gikiha na;
•Nag-abuso sa gahom si Cortes dihang ang iyang lider sa politika gitudlo nga hepe sa departamento nga dili siya qualified;
***
•Nag-abuso sa gahom si Rama sa pagtudlo sa City Hall sa duha ka igsuon sa ikaduha niyang asawa ug nagpa-goryo-goryo nga nailad ug nalipat siya sa pagpirma sa mga dokumento (sa walay pagpresentar og ebidensiya sa iyang katanga); ug
•Nag-abuso sa gahom si Cortes dihang gitugotan ang ilegal nga operasyon sa planta sa semento bisan gipahibawo sa iyang kaugalingong department head (city environment and natural resources officer) nga walay business permit ug environmental clearance ang kompaniya.