Nidaog ug napilde

Bisan nakugang sa kabastos ni Bise Presidente Sara Carpio sa pagtuki sa iyang budget sa 2025, si Kongresista Stella Quimbo ang nidaog sa kapin sa lima ka oras nilang lalis:

•Gitugotan niyang mangutana ang mga kongresista bisan nipasidaan si Carpio nga dili motubag;

•Gitugotan niyang matuki ang gibisto sa Commission on Audit (COA) nga wala tarunga paggasto ang confidential funds ni Carpio sa 2022; ug

•Gibasura niyang pag-insistir ni Carpio nga 2025 budget ray hisgutan pinaagi sa pagbasa sa ilang suwat sa tanang ahensiya nga tukion ang mga transaksiyon sukad sa 2019.

***

Bisan nagkanga-kanga si Quimbo sa pagbadlong niya, si Carpio ang labing dako og pilde sa ilang engkuwentro:

•Gisupak ang kaugalingong pasidaan nga dili motubag og pangutana kay wala kabadlong sa iyang kaugalingon pagsumbalik sa labing gikalagotan niyang mga kongresista;

•Nabantang nga wala siya kasabot, maong wala motahud, sa gahom sa Kongreso isip representante sa mga magbubuhis pagtuki sa iyang budget; ug

•Nausik ang tibuok hapon nga natanggong ang iyang budget, maong mobalik sa House karong Septiyembre 10 pag-atubang sa mga kongresista nga mas andam na sa iyang salida.

***

Laing napilde mao si kanhi presidente (ug human sa duha ka sunudsunod nga demosyon ordinaryo na lang nga kongresista) Gloria Macapagal Arroyo:

•Nasakpan nga namakak sa iyang pangangkon nga dili na kinahanglang hisgutan pagbalik kay natuki na pag-ayo ang 2022 confidential funds ni Carpio (mao kadtoy unang higayon nga nahibaw-an ang findings sa COA); ug

•Iyang pagpakita og suporta sa mga Duterte mahimong lisensiya sa maginukdanon nga administrasyon sa pagsusi sa tanan iyang katigayonan ug nangaging mga eskandalo.

***

Unsay mahitabo sa mosunod nga mga adlaw? Kon dili makalusad og People Power pagpalagpot ni Presidente Ferdinand Marcos Jr., si Carpio makaamgo nga si House Speaker Martin Romualdez ang nagkupot sa tanang alas:

•Mahimong ma-impeach si Carpio sa House ug mapadala ang articles of impeachment sa Senado karong semanaha ginamit ang makabungog nga mayoriya ni Romualdez;

•Mahimong makonbikto siya sa impeachment trial sa Senado kay upat ra ka senador ang manalipod niya; ug busa

•Mahimong dili maabtan og 11 ka adlaw nga mapugos siya pagpauli sa Davao nga wala nay gahom ni katungod pagdagan pagka presidente sa 2028.