Sara batok COA
Dili ang mga pangutana sa mga kongresista ang labing naka-apiki ni Bise Presidente Sara Duterte sa pag-atubang sa House Appropriations Committee niadtong Martes, Agosto 27. Kon dili ang report sa Commission on Audit (COA) nga wala tarunga og gasto ang kinadak-ang bahin sa iyang confidential funds sa 2022.
Hangtod karon maglisod pa sa pagtuo ang mga magbubuhis giunsa niya paggasto ang ?125 milyones sulod lang sa 11 ka adlaw. Mas lisod pa g’yud nilang dawaton nga ?73 milyones, o ?6 sa kada ?10, sa sekretong pundo ni VP Sara mahimong gikawat.
* * *
Unang engkuwentro nilang VP Sara ug sa COA nga nahibaw-an sa publiko maong report sa COA niadtong 2012, kanus-a mayor siya, nga kapin 11,000 ka trabahante sa Davao City Hall gisuweldohan og dul-an bilyon ka pesos bisan walay klarong trabaho.
Wala tagda sa mga Duterte ang findings sa COA. Nagpadayon ang pag-hire sa gidudahang ghost employees sa nisunod nga katuigan. Gihulga gani ni kanhi presidente Rodrigo Duterte ang COA auditors nga ihagbong sa hagdanan, o dagiton, o ideklarar nga durugista. Nikumpisal nga apil sa ghost employees ang mga berdugo sa Davao Death Squad nga silang Arturo Lascañas ug Edgar Matobato sa ilang affidavits sa International Criminal Court.
* * *
Human giisnab ni VP Sara sa kapin sa dekada, nakabawos ang COA. Bisan sa iyang pagsupak, gibasa sa mga kongresista ang mga detalye sa gi-disallow nga gasto sa confidential funds:
• ?69.8 milyones ang bayad sa confidential nga kasayuran (?10 milyones sa cash, ?34.8 milyones sa mga butang ug ?24.9 milyones sa tambal). Pero walay dokumento unsay kapuslanan sa kasayuran; ug
• ?3.5 milyones ang gipalit og mga lamesa, lingkoranan, ug desktop computers pero walay detalye unsay labot sa confidential operations.
* * *
Si VP Sara dunay hangtod sa Pebrero 2025 pagmatuod nga tinarung ang gasto. Kon mapakyas, kinahanglang i-uli ang ?73 milyones. Kon ipatigbabaw sa Korte Suprema ang mga petisyon batok sa legalidad sa iyang confidential funds sa 2022, tibuok ?125 milyones ang ipabalik.
Pero kuwarta ang kinagamyan niyang problema. Ang pagbinastos sa House mahimong mopadali sa iyang impeachment. Mahimong wala nay gahom nga mopauli sa Davao. Kana kon dili The Hague ang iyang tugpahan.
- Latest
