Tapales modepensa sa iyang WBC Asia super bantam title didto sa Cambodia
CEBU, Philippines — Dili usa, dili duha apan tulo ka Pinoy'ng mga boksidor ang mopakita'g aksiyon karong Septiembre 7 sa managlahing mga nasud.
Kini gumikan kay ang kanhi two-division unified world champion nga si Marlon Tapales mokatkat sa ring sa Olympic Stadium didto sa Phnom Penh, Cambodia sa maong petsa aron depensaan ang iyang trono isip WBC Asia super bantamweight champion batok ni Indian challenger Saurabh Kumar.
Sa susamang adlaw, ang mga Sugbuanong sila si Bryx “The King” Piala sa ARQ Stable ug John Ver Espra sa Prime Fight Gym mo-away sab.
Si Piala (9-1, 3KOs) makigbugno batok sa way pildeng Hapon nga knockout artist nga si Mikito Nakano (10-0, 9KOs) alang sa bakanting Oriental and Pacific Boxing Federation (OPBF) featherweight title dito sa Korakuen Hall sa Tokyo, Japan, samtang si Espra
makigsangka ni Orkhontungalag Unubold sa Mongolia sa usa ka non-title bout nga gikatakda sud sa unom ka hugna ubos sa flyweight division didto sa Incheon, South Korea.
Ang away ni Tapales batok ni Kumar kabahin sa iyang preparasyon alang sa laing world title fight nga nag-atang kaniya sa unahan sud ning tuiga.
"I am happy to be fighting in the great country of Cambodia and excited to give them a good show. Thank you KKIF and Wurkz Energy Drink for making this fight possible. I am grateful to my team, especially Sanman Boxing and Knuckleheads, for their unwavering support and dedication throughout my career," matud pa ni Tapales nga rated No.2 sa WBC, No.3 sa IBF, ug No.4 sa WBA.
Ang 32-anyos nga si Tapales nagkupot og 38-4 rekord uban ang 20KOs, samtang si Kumar, 28, kausa pa lamang mapilde sud sa 13 ka away uban ang 6KOs.
- Latest
