Paglaslas sa budget
Nahibawo na tang tanan unsay mahitabo sa mas dakong budget nga gipangayo ni Bise Presidente Sara Duterte Carpio sa sunod tuig. Bisan sa pagpa-goryo-goryo sa mga senador ug mga kongresista, klaro nga ilang laslasan ang ?2.037 bilyones nga gisugyot sa Departmet of Budget and Management (DBM) para sa Office of the Vice President (OVP).
Mahimong ganing dili kaabot og katunga ang madawat sa OVP sa 2025. O i-pareha sa kapin sa ?700 milyones nga gipisik sa administrasyon ni kanhi presidente Rodrigo Duterte para ni kanhi Bise Presidente Leni Robredo.
* * *
Sa mga senador nga nisubli sa budget sa OVP niadtong Miyerkules, si Senador Risa Hontiveros ra ang wala magpakaaroningnon. Siya ray nikuwestiyon sa kuwestiyonableng mga gastohan:
• Mga programa nga nisapaw ug busa mahimong ipuno sa gipatuman na nga mas dagkong mga programa sa Department of Health (DOH), Department of Social Welfare and Development (DSWD) ug Department of Labor and Employment (DOLE); ug
• ?100 milyones para sa bags ug school supplies nga naglakip sa ?10 milyones sa librong wala pa masubli kon haom bang ipabasa sa mga bata.
* * *
Sunod nga atubangon ni Carpio ang mga kongresista. Nga mahimong dili sama kakalma ni Hontiveros ug kamapanagan-on sa ubang mga senador. Labi na ang reelectionists nga dili ganahang mawani sa minilyon ka rehistradong mga botante sa Davao ug Mindanao sa eleksiyon sa sunod tuig.
Mas isog nga pinangutan-an ang mga kongresista. Kay dili magkinahanglan sa Davao pagdaog sa ilang mga distrito. Silay kanunayng gibalikas sa mga Duterte. Ug mga sakop ni House Speaker Martin Romualdez ang paboritong tambaloslos ni Carpio.
* * *
Gitakda untang tukion sa mga kongresista ang budget sa OVP niadtong Agosto 15. Pero nihangyo si Carpio nga unya na lang sa Agosto 27. Kon basehan ang ka-apiki ni Carpio sa pagtubag sa yanong mga pangutana ni Hontiveros, nagkinahanglan ang bise presidente og dugang lugway sa pagpangandam.
Gawas nga kinahanglang basahon unsay sulod sa iyang libro, angay sab nga suhituon ang mga detalye, ug labaw sa tanan ang kapuslanan, sa iyang mga proyekto. Kay human sa ilang engkuwentro ni Hontiveros mas andam nang mga kongresista sa iyang naandan nga lipat-lipat, panginsulto, ug pamuyboy.
- Latest
![](https://www.philstar.com/images/stand-in-photo-male.jpg)
![](https://www.philstar.com/images/stand-in-photo-male.jpg)
![](https://www.philstar.com/images/stand-in-photo-male.jpg)