Leksiyon sa mga Duterte
Kon unsa kahawod si kanhi Presidente Rodrigo Duterte niadtong nagtungkawo sa Malakanyang–nga ang tanang sulti giisip nga balaod–mao sab siya ka-inutil karon. Tanan niyang pasidaan gibungul-bungolan. Ug tanan niyang pagsaway–bisan gisagolan sa naandan nga mga balikas–wala nay nagtagad.
Mas importante: Kon unsa siya kakublan sa una–gawas sa presidential immunity, walay nangahas pagbaraw niya sa kahadlok nga maoy isunod pagpatay, pagpriso o pagkandado–mao sab siya ka walay panagang karon. Human ulug-ulogi nga duphan sa administrasyon ni Presidente Ferdinand Marcos Jr., may mga timaan nga nitabang pagpalig-on sa mga pasangil batok niya.
* * *
Kay mat-an pa man sa pinya sa Davao, si Duterte nakabantay na sa pagbalitok sa administrasyon bisan nagwara-wara pa sa nasudnong sobereniya batok sa International Criminal Court (ICC), maong ni-alkontra na sayo ning tuiga. Pero pulos pakyas ang:
• Pasangil nga bangag ang presidente bisan gidasonan sa polvoron video ug balaudnon sa mandatory random hair follicle drug test sa presidente ug ubang opisyal sa gobyerno;
• Pagkumbinser sa kasundalohan ug kapolisan pagbakwi sa suporta sa presidente;
• Pagbuwag sa Mindanao gikan sa Republika; ug
• Pagdasig og people power pinaagi sa Maisug rallies.
* * *
Samtang nagkainit ang sinultihan, nagkagamay ang ilang kalibotan. Gilibotan nang tagoanan ni Apollo Quiboloy, gigapos nang iyang kabtangan, gi-ban nang Philippine Offshore Gaming Operators (POGOs) ug nag-ung-ong nang arrest warrants sa ICC.
Gawas sa nabisto nga pagmaniobra sa ilang police blotters aron mohiyos ang crime rates ug padayong makapanghambog ang Davao nga labing luwas nga syudad sa tibuok kalibotan, ambot unsa pay ubang mga baho sa mga Duterte nga mo-alisngaw sa mosunod nga mga adlaw.
* * *
Hinaot nga ang anam-anam nga paghagsa sa mga Duterte kapanaminan sa ubang mga politiko nga nahubog sab sa gahom: Walay pagpangabuso nga molungtad hangtod sa hangtod; ug nga moabot gyod ang adlaw sa panudya.
Hinaot nga naleksiyon sab ang mga Marcos. Nga human mahipos ang mga Duterte gikabalak-an nga mamugos pagpabilin sa Malakanyang lapas sa 2028. Napalayas ang diktadura sa ilang amahan 38 ka tuig ang nilabay tungod sa lapad nga pangurakot ug pag-bangkarota sa nasudnong ekonomiya. Walay sukaranan ang pagtuo nga mangiyugpos ang mga Pilipino kon banhawon ug palabwan pa ang kahangol sa ilang mga ginikanan.
- Latest
