Valdez, Carlos ‘di pa rin lalaro
![Valdez, Carlos �di pa rin lalaro](https://media.philstar.com/photos/2024/08/12/3_2024-08-12_20-25-26.jpg)
MANILA, Philippines — Posibeng hindi pa rin maglaro sina team captain Alyssa Valdez at Tots Carlos dahil sa injury sa pagsalang ng Creamline sa crossover second round ng 2024 Premier Volleyball League (PVL) Reinforced Conference.
“As of now hindi pa namin sigurado. Hopefully, makasama sila,” ani coach Sherwin Meneses. “Depende kasi sa medical team namin, sa mga PTs namin kung kailan sila makakabalik, pero hindi pipilitin.”
Pupuntiryahin ng Cool Smashers ang tiket sa knockout quarterfinals sa pagsagupa sa nagdedepensang Petro Gazz Angels sa Pool C.
Nakatakda ang duwelo ng Creamline at Petro Gazz ngayong alas-3 ng hapon matapos ang bakbakan ng Chery Tiggo at Choco Mucho sa ala-1 ng hapon sa Philsports Arena sa Pasig City.
Sa huling laro sa alas-5 ng hapon ay maghaharap ang PLDT at ZUS Coffee.
Tinapos ng Cool Smashers, Crossovers at High Speed Hitters ang first round bitbit ang magkakatulad na 4-1 record sa Pool A habang kulelat sa Pool B ang Gazz Angels (2-3), Flying Titans (1-4) at Thunderbelles (0-5).
Swak na sa knockout quarterfinals ang Akari Chargers (6-0) at Cignal HD Spikers (5-1).
Isang panalo lang ang kailangan ng Creamline, Chery Tiggo at PLDT para makasama ang Akari at Cignal sa quarters.
- Latest