IBP Basketball League: PD Lex Idols gikoronahang back-to-back champions
![IBP Basketball League: PD Lex Idols gikoronahang back-to-back champions](https://media.philstar.com/photos/2024/07/29/pdlex_2024-07-29_23-26-03.jpg)
CEBU, Philippines — Ang PD (Pepito-Daluz) Lex Idols milampornas sa Pañeros, 59-42, aron langkaton ang ikaduha nilang sagunson nga kampiyonato sa Integrated Bar of the Philippines (IBP) Basketball League 2024 niadtong weekend didto sa Capitol Parish Gym sa may dalan Escario, dakbayan sa Sugbo.
Nanginit gikan sa sinugdanan, ang Lex Idols wala na molingi pa sukad sila mi-establisar og 18-9 nga labaw human sa nag-unang 10 minutos sa aksiyon.
Ang kanhi varsity player sa Sacred Heart School-Ateneo de Cebu (SHS-AdC) Magis Eagles nga si Emman Malazarte mibira sa ikaduha niyang sunod-sunod nga MVP award.
Si Malazarte mitapos uban ang 17 punyos, siyam niini iyang gitagak sa katapusang kuwarter diin gilabhan sa Lex Idols ang Pañeros, 14-6, aron silyohan ang 17 puntos nilang demolisyon.
Mihipos si Fermin Pepito og siyete puntos, sila si Red de la cerna, Angelito Ortiz, Edward Kong, Karl Sayson, ug Danrey Cabataña mitipig og sayes puntos matag usa, samtang si Jeremie Nuñez miamot og singko puntos alang sa Lex Idols, nga mibomba sa Pañeros og siyam ka 3-pointers.
Ubos sa pagtimon ni playing coach Ferdinand "Bong" Pepito nga mibulsa sa ikasiyam niyang korona, ang ubang mga sakop sa Lex Idols mao sila si Jessie Capoy, Tito Apolinario, Jave Aton, Edz Ibañez, Jan Michael Albaño, Anthony Leigh Sibi, Jemil Christian Marquez, Jennifer Jabil, ug Alberto Montefalcon.
Laraw nilang makakulit og three-peat sa panapos nga komperensiya sa liga sa dili pa matapos ang tuig.
- Latest