Inutil sa rice cartel
Imbes moangkon nga namakak ug nagpataka ra sa iyang saad nga himuong ?20 ang kilo sa bugas humay, ang administrasyon ni Presidente Ferdinand Marcos Jr. nihimo og laing pasalig: Nga mokanaog bale og ?7 ang kilo sa bugas humay sugod sa unang semana sa sunod buwan sa Agosto.
Mas sayo nato silang kapaninglan. Palihug timan-i tagpila ang presyo sa bugas humay sa mga tindahan ug kamerkadohan. Atong bantayan kon malaslasan ba tinuod duha ka semana human sa ikatulo nga State of the Nation Address (SONA) ni Marcos Jr. karong hapon.
***
Nipasalig ang Department of Agriculture (DA) nga ang kinabag-ohan nga pasalig wa hulbota gikan sa tumoy sa ilang buhok. Kon dili base sa kuwentada sa Philippine Statistics Authority (PSA) nga maoy positibo nga epekto paglaslas sa buhis sa imported nga bugas humay gikan sa 35% ngadto na lang sa 15% sugod karong buwana.
Kadaghan na nipasalig ang gobyerno nga mobarato ang bugas humay. Pero kanunay lang nabawo ang mga konsumidor. Samtang gihangop ang matag saad, ilang nadiskubrehan nga imbes mas barato nga bugasan buslot nga buyot ang ilang nadawat.
***
Sa wa pang bakak ni Marcos sa kampanya sa eleksiyong presidensiyal sa 2022, nipasalig ang administrasyon ni kanhi presidente Rodrigo Duterte nga mobarato bale og ?10 ang kilo sa bugas humay sa pagpasar sa Rice Tarrification Law niadtong 2019.
Lima ka tuig human naaprobahan ang mga lagda sa mas luag nga importasyon sa bugas humay nagsige og sulbong ang presyo sa bugas humay. Nga niabot og kapin sa ?60 ang kilo dihang namugos si Marcos Jr. paglingkod isip Agriculture secretary.
***
Kinadak-ang rason nga wa mobarato ang bugas humay bisan sa Rice Tarrification Law ug gikabalak-ang magpabiling mahal bisan sa laslas sa buhis sa importasyon mao ang, nakatag-an ka, rice cartel. Padayon nilang gigawongan ang importasyon ug gidiktahan ang presyo.
Nipasidaan si Marcos Jr. sa niaging SONA nga inihap na lang ang mga adlaw sa mga nagmaniobra sa mga produkto sa agrikultura. Pero way bisan usa nga nakasohan. Hangtod karon. Hinaot ang iyang ka-inutil way labot sa pasangil nga ang utok sa cartel mao ang kasosyo sa negosyo sa paryente ni First Lady Liza Araneta Marcos.
- Latest
