Debate ni Rama ug Garcia
Dihang nakita nako ang kabahin sa pakighinabi ni Komentarista Jason Monteclar kang suspended Cebu City Mayor Mike Rama, nakahinumdom nganong gibalibaran kutob sa mahimo ang tanang awhag sa pakighinabi ni Rama parte sa mga kontrobersiya sa wa pa ug human nasuspenso sa iyang puwesto.
Nahiagoman ni Jason ang pagtulon-an sa reporters nga napugos pakighinabi ni Rama sa daghang katuigan: Taas ug tuyuk-tuyok ang tubag nga kasagaran wa motakdo sa pangutana, o siyay magbuot sa pangutana, o kon mo-insistir ka sa imong pangutana ang iyang ganahan nga pangutana mao ang tubagon.
***
Imbes tarungon og tubag ang mga pangutana ni Jason sa gidudahang mga anomaliya sa iyang mga sinaligan nga nadiskubrehan ni acting Mayor Raymond Garcia --sama sa suyop sa gasolina sa mga sakyanan sa Cebu City Disaster Risk Reduction and Management Office ug sa peke nga IDs sa Persons with Disability-- nitulibagbag si Rama.
Gisumbalik niya og pangutana si Jason kon si Garcia acting mayor ba o taga Commission on Audit na. Nagtuo ba si Rama nga si Garcia kutob ra sa pagpadayon ug way katungod pagsusi sa gikuwestiyon niyang mga transaksiyon?
***
Sa pangutana si Jason parte sa ?405 milyones nga gipangayo ni Rama nga budget sa pag-host sa Cebu City sa Palarong Pambansa 2024, nga gilaslasan ni Garcia ngadto sa ?262 milyones pinaagi sa pagtangtang sa mga gastohan nga wa kinahanglana, wa say klaro ang tubag ni Rama.
Nisumbalik siya og pangutana nganong gisubay pa man ni Garcia ang aprubado nga budget. Ug nipasumbingay og pasangil nga nangita lang g’yud si Garcia og sayop.
***
Dihang nangayo og katin-awan si Jason sa kalangay sa pagtukod sa Cebu City Medical Center (CCMC), nga wa pa gihapon mahuman human sa dul-an siyam ka tuig ug ?2 bilyones nga gasto, gisitsitan siya ni Rama ug gipahilom. Dihang nisal-ot si Jason nga nahibung si Garcia sa kalangay, panghagit nay tubag ni Rama.
Gihagit ni og debate si Garcia. Wa moklaro unsay ilang debatehan pero nipasabot nga isip dakong opisyal sa syudad nahibawo si Garcia unsay nahitabo sa CCMC. Kon mag-abot silang Rama ug Garcia, hinaot nga ilang debate mas mapuslanon para sa mga Sugbuanon kay sa simang nga mga tubag ni Rama.
- Latest
