Di gustong mapalayas

Sukwahi sa kakalma nga iyang gipakita sa publiko, ug kamapasayluon sa mga kaatbang, si Presidente Ferdinand Marcos Jr. labihan ka-insecure. Nga way bisan gamayng pasumbingay sa hulga nga iyang palabyon. Di sa sulti lang kon dili sa buhat. Ginamit ang iyang mga sinugo ug mga ahensiya sa gobyerno.

Mao nga samtang dugayng nagpakahilom sa mga atake ni kanhi Presidente Rodrigo Duterte batok niya, ug bisan sa iyang pagdupa sa mga bulilyaso ni Bise Presidente ug Education Secretary Sara Duterte, gisugdan na paghipos ang mga Duterte ug ilang mga alyado.

* * *

Samtang wa mokubit si Marcos Jr. sa tokar-tokar nga atake sa kanhi president --wa na siya tawga og bangag pero gihulgang mapareha sa gidangatan sa iyang amahan-- determinado ang iyang mga sinugo pagpugong sa paglapad sa mga protesta sa ubang bahin sa nasud:

• Wa hatagi og permiso ang mga rally ni Duterte sa Bulacan (nakanselar sa Bustos) ug Negros Oriental (nadayon pero nabalhin og kaduha sa Dumaguete City); ug

• Nasuspenso ang lokal nga mga opisyal nga nihatag og permiso (silang Davao del Norte Governor Edwin Jubahib ug Cebu City Mayor Mike Rama).

* * *

Labing uwahing timaan sa insecurity ni Marcos Jr. mao ang pagkalagpot ni Migz Zubiri isip presidente sa Senado. Gipasagdan si Zubiri sa pag-dribol-dribol sa Charter Change pero nahagtos ang pailob sa Malacañang dihang wa mabadlong ang imbestigasyon ni Senador Bato dela Rosa sa PDEA leaks.

Bahala na kon si Zubiri puwerteng sipsipa sa pagpasar sa Maharlika ug bahala na kon wa magkadimao ang imbestigasyon ni Dela Rosa, kinahanglan nga patagmon ang mga napakyas sa pagdupa sa presidente.

* * *

Ang insecurity ra ni Marcos Jr. ang makapatin-aw sa mosunod nga mga hanig: Pagpasar sa House og resolusyon nga nag-awhag sa Pilipinas pagbalik sa International Criminal Court (ICC), briefer sa Department of Justice nga naglakip sa rekomendasyon sa pagpatuman sa arrest warrants sa ICC, ug imbestigasyon sa House Committee on Human Rights sugod karong adlawa sa laktod nga pinatyanay sa drug war ni Duterte.

Ug nahibawo na tang tanan unsay sangkoan ning tanang mga hanig. Kay, nakatatag-an ka, kinsa man tuod ang ganahan nga mapalayas sab sama sa iyang amahan, insecure ang anak sa diktador.