Pag-insistir sa di tinuod
Ang problema sa pag-insistir nilang Presidente Ferdinand Marcos Jr. ug Bise Presidente Sara Duterte Carpio nga nagpabilin ang ilang panaghiusa ug nga magpadayon pa ang ilang UniTeam, bisan sa tanang linabayay og lapok sa ilang palibot, mao nga sila na lang duha ang nituo.
Tanang mga timaan nagpakita nga nakabuylo nang panag-unay sa ilang mga dumadapig, bisan sa mga sakop sa ilang isig ka pamilya, bisan sa tam-is nga pasaligay sa presidente ug bise presidente sa malungtaron nilang panaghigalaay. Bisan sa politika, ang aktuwal nga buhat mas bug-at kay sa sulti.
* * *
Unsaon paglihok sa makalilisang nga makinarya sa higante nga politikanhon nga mga partido, nga maoy nipakayab sa ilang kandidatura nilang Marcos ug Carpio sa 2022, kon ang mga lider nakabungat na kinsay ilang manok sa nagbaga nga panagsungi?
Hapit tanang partido sa House of Representatives ug sa Senado nilumbay na parang Marcos ug House Speaker Martin Romualdez, pinaagi sa laktod nga pagpapas sa tanang ?650 milyones nga confidential funds ni Carpio. Ang nihiyos pag-ayo nga PDP nga way Laban mao na lang ang nagpabilin uban sa mga Duterte.
* * *
Bisan ang lokal nga mga opisyal nakapili na. Kaduha na magbalikbalik sa Sugbo si kanhi presidente Rodrigo Duterte sa niaging duha ka buwan. Si Cebu City Mayor Mike Rama, nga gipasanginlan ni Duterte nga drug protector, mao na lay nagtikaw-tikaw sa paghangop nila.
Tanang kongresista nga ni-amen nang Romualdez ug tanang mayor nga ubos sa payong ni Gobernador Gwen Garcia, nga determinadong magpabilin ang iyang anak sa Gabinete, niisnab sa kalihokan ni Duterte sa Cebu City.
* * *
Mahimong naningkamot silang Marcos ug Carpio pagkumbinser sa ilang mga dumadapig nga ang ilang personal nga relasyon makalahutay sa tanang pagsuway. Pero labawng naglibog ang mga dumadapig. Di lang tungod sa lalis sa mga lider. Kon dili sa mas bastos nga insultohay sa nagbangga nilang trolls.
Mahimong padayon nga nagkasabot silang Marcos ug Carpio sa pribado nilang panagsulti. Pero ang publikong pasundayag sa panagribal sa ilang mga kandidato sa 2025 ug ang pagbangga sa politikanhong mga ambisyon sa ilang mga kampo sa 2028 mopakita, sama sa nabantang sa kampanya sa 2022, nga wa sila magsulti sa tinuod.
- Latest
